Sunjay Kapur ro cheng vbc 10,300 tunge khawm dawn?

Sunjay Kapur ro cheng vbc 10,300 tunge khawm dawn?
India pahausa Sunjay Kapur, kum 54, chu June ni 12, 2025 khan lungphuchawlin a thi thut mai a, sumdawnna leh entertainment khawvel a barakhaih hle a ni. Sunjay hi Bollywood star Karisma Kapoor nen pawh lo innei tawh, an inneih leh inthen boruak pawh India-a lar hat tham kha a ni a. A thih thu a than rual hian a ro tunge khawm ang a, a sumdawnna tuin nge enkawl zui ang tih te chu zawhna, mite ngaihven a ni nghal.
Sunjay hi motor part siam lama hriathlawh tak Sona Comstar chairman a ni a, 2015-a a pa boral hnua he company enkawltu niin, an company chu international market-ah hung chhuakin, bung thar a kaipui a, Sona Comstar pawh khawvel huapa lirthei part siamtu hriathlawh a ni ta a ni.
Bloomberg-in a tarlan danin Sona Comstar hlutna hi cheng vaibelchhe 31,000 vel a ni a, mahse, Sunjay thih thu a than hnu lawkah an company share hlutna chu 7%-in a tlahniam nghal a ni.
Sunjay hian a nupui then tak Karisma Kapoor nen fa pahnih- Samaira, kum 20, leh Kiaan, kum 14 an nei a, a nupui pathumna Priya Sachdev nen fapa, Azarias, kum 6, an nei bawk. A fate leh a nupui Priya pawh hi company lamah an inhnamhnawih loh avangin Sona Comstar enkawltu hi an nih zui a rinawm loh. India.com-in a tarlan dan chuan Sunjay-a farnu chu company enkawltu tur a nih hmel.
Hetihrual hian Sunjay-a mimal hausakna hi Forbes chuan cheng vaibelchhe 10,300 niin an tarlang a, Hindustan Times-in a tarlan danin Sunjay thihsan ro te chu a nupui Priya Sachdev kutah a awm dawn niin a lang. Hetihrual hian Karisma nena an fate pahnih- Samaira leh Kiaan te tan pawh cheng vaibelchhe 14 hu bond a kalsan a, hei bakah an unau hian thlatin Rs 10,00,000 an dawng ziah thei dawn bawk a ni.
Sunjay Kapur hi 1996 khan designer Nandita Mahtani nen innei a, 2000-ah an inthen lehta mai a. 2003-a Bollywood star Karisma Kapoor nen innei lehin, fa pahnih an nei a, 2016-a an inthen a, 2017-ah tuna a nupui model leh actress ni bawk Priya Sachdev nen an innei leh ta a ni.