Superman film thar a hit dawn
James Gunn film siam, David Corenswet channa ‘Superman’ chu tun weekend hian cinema hall-ah an chhuah tan dawn ta a, opening weekend-ah cinema hall ticket hralhna atangin US-ah dollar maktaduai 130 vel la lut thei turin an chhut a, US pawnah maktaduai 100 vel la lut bawkin, khawvel huapin dollar maktaduai 230 vel la lut thei turin an chhut.
Superhero kan hmelhriat hmasak ‘Superman’ hian DC Universe a rawn chawikang leh deuh dawn niin an ngai a, kumina film tlangzarh tur zinga ngaihven hlawh ber niin, 2025-a film sum la lut hnem ber a nih theih an beisei a, khawvel ram hrang hranga cinema hall 60,000 chuangah an tichhuak dawn a ni.
He film-ah hian David Corenswet chu Clark Kent aka Superman lemah a chang a, Rachel Brosnahan chu Lois Lane lemah changin, Nicholas Hoult chu Lex Luthor lemah a chang ve thung.
He film-ah hian Jor-El leh Lara Lor-Van te chuan an fasen Kal-El chu an planet Krypton a chhiat dawn avangin a dam khawchhuah theihnan Lei (Earth)-ah an thawn a. Lei-ah chuan Jonatan leh Martha Kent ten Smallville, Kansas-ah lo enkawlin, Clark Kent tih hming a pu ta a. Ni êng atanga chakna (power) nei thei a ni. A nitin eizawnnaah chuan Daily Planet chanchinbu-ah reporter a ni a, chuta a thawhpui Lois Lane nen an inhmel duh ta a.
Superman chuan Boravia-in US a rûn tur a lo dang a, mahse, billionaire, Lex Luthor chuan sorkar thuneitu te hminin, Superman chu an ram tan a him lo tiin, a tul chuan a hneh theih tur thu a lo fah ve thung a. ‘Hammer of Boravia’ an tih mai, Ultraman chuan Superman chu natakin a hliam a, ui superpower nei Krypto chuan Superman chu Antartica-a Fortress of Solitude-ah hruai thlengin, chutah chuan Superman chuan a chakna te a nei let leh ta a. Ultraman chu Lex Luthor-a thuhnuaia awm a lo ni a, Superman tawmna chu an run ta a. Superman chu superhero dang Green Lantern, Mister Terrific leh Hawkgirl te nen thawkhoin khawvel chhanhim tura an chet dan vel te tarlan a ni.
Get real time updates directly on you device, subscribe now.
Next Post