Supreme Court-in buhpawl leh vaimim kung ro hal a khap

Supreme Court of India chuan Rajasthan, Punjab leh state dangte chu a hmaa order a lo tih chhuah tawh angin Diwali kut vuakvetah mei hal tawh lo turin a ti. Thawhlehni khan Supreme court chuan Punjab sorkar chu buhpawl leh vaimim kawr te hal chungchangah a hau a, supreme court chuan politics thila inbeihna a awm lo tih a thlir pah reng a ni. “Buhpawl leh Vaimim kawr ro hal te hi kan duh lo a, in titawp tur a ni. Engtin nge in tih kan hre lo, in hna a ni. Mahse in titawp tur a ni. Thil dang pawh rang taka tih ngai a awm,” tiin Supreme Court chuan Punjab sorkar a hrilh a ni.
Rajasthan leh States dangte pawh hrilh nghalin Diwali Festival vuakveta mei hal khapna dan a lo tih chhuah tawh chu zawm vek turin thupek a chhuah leh a ni. Supreme Court chuan Rajasthan sorkar chu air pollution a siam chhuahte titlem turin a chah a, a bik takin festival hun chhungin a ni zual a, pollution laka kan inven tlan hi mi tute pawhin kan mawhphurhna a nih thu a sawi tel bawk a ni. He Court thupek hi Udaipur leh a chhehvela Air Quality Index lo tla hniam zel leh a khuahkhirhna awm si lo leh pollution levels lo sang zel tur laka hma la tura ngenna lo kal atanga siam a ni. “Boruak bawlhhlawh a insiam a, court mawhphurhna emaw ti tlatin ngaihdan dik lo kan nei a ni. Mi tute mai pawhin kan tihtur leh mawhphurhna a ni,” tiin Court chuan a sawi a ni.