Supreme Court in Same-Sex marriage ngaihtuah tan

Neih inang inneih (same-sex marriage) pawm leh pawmloh tur chungchang chu April 18 khan Supreme Court ah ngaihtuah tan niin Centre nena inbakaihna a thleng nghal a. Chief Justice of India D.Y. Chandrachud chuan ‘Hetah hian thuneitu kan ni’ tia sawiin sorkar chuan court proceedings kalpui dan turah judge te tihdan tur a hrilh tur a ni lo a tihial bawk.
Sorkar aiawha ding Solicitor General Tushar Mehta chuan ‘mi fing leh thiam chungchuang tak panga ten’ rampum aiawhin thutlukna siamin inneihna chungchangah ‘new socio-legal relationship’ thar an siam thei lo tiin a sawi a. Judge te chuan Parliament thutlukna siam turin an dah mai tur a ni tia a sawi chu CJI chuan a chhang a ni.
Mehta chuan petitioner tena neih inang inneih dan anga pawmna an thehluh chu eng vangin nge court hian Parliamant in a ngaihtuah hma in a ngaihtuah a ti bawk a.
“A pawi hle mai, Mr. Soilicitor General, hetah hian thuneitu kan ni a. Kan kalpui dan tur min hrilh suh” tiin Chief Justice Chandrachud chuan a chhang a ni.
Mehta chuan ngaihtuahna neihah pawh sorkar chuan ‘hreh deuhna a nei’ tia a sawi zui chu Justice Sanjay Kishan Kaul chuan lo changin, “Court thu ngaihtuah mekah intel dawn lo i tihna em ni? Sorkar a tel lovang tia sawi chu a landan amawi lo hle mai a. He thil hi serious tak mai a ni asin” tiin Justice Kaul chuan a sawi a.
“Ka sawi zawng chu he issue hi mi fing leh thiam tak tak panga te thutlukna siam tur chi niin ka hre lo a ni. India chhimlama loneitu in eng nge a duh, North East a sumdawngin eng gne a duh kan hriat hmasak a ngai a. Ka chian em em chu kan vai ma hian ramin same sex marriage chungchanga an ngaihdan kan hre lo a ni” tiin Mehta chuan a sawi zui thung.
Senior advocates Mukul Rohatgi leh K.V. Vishwanathan, petitioners te aiawha ding chuan Supreme Court chu Article 32 of the Constitution behchhanin an fundamental rights to equality, equal treatment leh zahawm leh thatak nun an hman theih nana kalhchilh an ni an ti a.
Bench chuan petitioner te chu an issue kenluhte an sawifiahna hun remchang a pek tur thu a sawi a. “Petitioner te hi 15 minutes hun kan pe ang a, chutah chuan an duh tawkin an sawifiah thei ang a. Eng nge tihtur leh tihloh tur kan tihchian a ngai a. Chumi hnuah sorkar in a hnialkalh thei ang. Sorkar in a dodalna chu an sawi a zir a ni ang” tiin Chief Justice Chandrachud chuan Mehta hnehah a sawi a.
Intervenor aiawha ding senior advocate Kapil Sibal chuan same sex marriage chungchang chuan personal law, adoption leh succession law a nghawng ngei dawn a ti a, “Chutak chu kan thlurbing tur a ni” tiin Sibal chuan a sawi a.
Preliminary objection a siamah sorkar chuan same sex marriage chu ‘urban elitist view’ tiin a sawi a. Judicial in same sex marriage remti ta se ‘new social institution’ siama same sex marriage remtih chu right tia sawi a rem lo a ti bawk.
Centre chuan court ni lovin parliament chu same sex marriage chungchangah ‘socio-legal institution’ serhbik a nihna pe thei awm chhun an a ti bawk a. Sorkar chuan India mipui tam ber te chuan ‘inneihna thianghlim’ chu mipa leh hmeichhia te inneihna angah an ngai a ti bawk. Apex Court chuan a ngaihtuah chhunzawm zel dawn a ni.