US Supreme Court chuan president hlui Donald Trump chuan amah hekna thenkhatah president a nihna anga khin theihlohna (immunity) a nei tiin thutlukna a siam a, hei vang hian kum 2020 election tihchingpen tum tia puhnaa a thubuai ngaihtuahna chu a ti hnufual ngei dawn a ni.
US-in inthlan a neih hma thla li a la awm tihah Supreme Court chuan thutlukna siamin Conservative Chief Justice John Roberts chuan president chuan office a luah lai chuan official thila a thutlukna a siamah criminal prosecution lakah ‘absolute immunity’ a nei tiin a sawi.
“Unofficial thilah chuan immunity a awm lo” tia sawiin Roberts chuan Trump case chu court hniam zawkah thawn thlain president hlui thubuai neih te chu official nge unofficial te ni hlawm tichiang tura tih an nih tur thu a sawi.
Liberal Justice pathumte chuan Trump chu an thlawp lo thung a, Conservative judge 6 in Trump chu an thlawp thung.
Liberal Justice Sonia Sotomayor chuan ‘kan ram history ah a office chu criminal law bawhchhiat nana hmang chunga criminal prosecution laka a him a la awm ngai lo’ tia sawiin, “chuvangin kan democracy tan hlauhawm ka tih avangin ka pawm thei lo” tiin a sawi.
Trump-a thubuai hi a tirah chuan March 4 a ngaihtuah tan tura tih a ni a. Mahse, Supreme Court chu conservative justice ten an thunun niin an zinga pathum lai chu Trump hun laia ruat an nih bawk avangin February thlaah a case ngaihtuah an sawn hma a ni.
Trump hian criminal case pali lai neiin US president inthlan neih hnuah chauh a thubuai te chu ngaihtuah a nih theih nan hma a la nasa hle a ni.
May 30 khan New York court chuan Trump chu felony charge 34 siamsakin chung te chu kum 2016 presidential campaign a neih laia a sex scandal kaihhnawihah business records dik lo taka siamah puhna te a ni hlawm bawk.
-- Advertisement --
Biden an sawisel
US President Joe Biden chuan US Supreme Court chuan Donald Trump laka partial immunity a pek avangin nakin zelah thil pawi thei an siam tiin a sawi.
Judge te chuan ‘rule of law’ beng hniamin Americans te tan thil pawi tak an ti a ni a ti bawk a. Trump erawh chuan court thutlukna chu democracy tan ‘hnehna ropui’ a ti ve thung.
President Biden chuan, “He ram hi America-ah Lal an awm lo tih principle hmanga din a ni. Tute pawh hi dan hnuaiah inang tlang vek kan ni a. Tumah dan chunga leng an awm lo, United States president pawh dan chunga leng a ni lo.
“Vawiina court thutlukna siam hian president chuan tih theih loh a nei lo a tihna tluk a ni a.
US capitol a pawikhawih tur mite tirkhawmtu khan cirminal conviction hmachhawn tur a ni a. American mipuite hian inthlan hma ngeiin court atangin chhanna dawn an phu a ni. Mahse, court thutlukna avangin chung chu a thleng thei dawn ta lo niin a lang,” tiin a sawi.
Democratic Congresswomen Judy pawhin court thutlukna siam chu sawiselin, “Kei nina mawi lo leh dik lo leh criminal nia kan ngaih te pawh president chuan nakin zelah a official capacity-in a tithei zel tawh dawn a, dan lakah a him zel tawh dawn a ni,” tiin court thutluna a dem thu a sawi bawk.