SUSTAINABLE, INTEGRATED FARMING IN MIZORAM – 2

RK Dawla
Mb 9366095658

1. India hmarchhak kilah, khawvela ram changkang lo leh Ralvawng uite tam duah Bangladesh nen kan inri a. Khawvela ram leilung hausa, politic kal dik lo vanga rethei reh thei lo leh buai reng Myanmar nen ramri thui tak kan intawm bawk. Kan thenawm state – Assam, Manipur leh Tripura te anga history mumal nei thui ve lo leh hmasawnnain a zuan kahlên rei kan ni bawk. A ram leilung tam zawk tlangdung hriam leh awihpang niin, Chhura hun lai ata tawha kan practice jhumm hmangin khawpui leh thingtlang mi tam ber kan la inawmtlei mêk a. Pi leh puten tlang chhip hmun thawveng leh awih tên an bawh vangin tlawhpawh kan harsa êm êm a. Civilization rêng rêng, luipui phai ruam atangin a intan deuh vek laiin, keini chu a letling zawngin kan khawsa a. Kan danglam bik a, kan ram thenawmte anga che ve tur leh economy mumal tak nei tur chuan, kum 130 zet Kristiannain min chenchilh hnu-ah pawh bul tan kan la ngai fo.
2. Hnam tlêm tê, mihring thâwl êm êm, cheibawl theih ram ruak tam êm êm, mihring theihna sâng tak ni lawi sî, kan rethei êm êm tlat mai hi tunlai khawvelah chuan thilmak a ni tan tawh a. Industry leh Factory mumal awm lo, mi tam ber suangtuahna chu thla hlawh neia sawrkar hnathawh a ni a. Kuthnathawh a zahpuiawm lohzia leh hlawkzia sawitu tam berte chu kuthna thawk tak tak loho an ni deuh zel bawk a. Hnam danglam tak kan ni. Kan rilru lo anga pawn lama lan chhuah hi kan taihmâkna chi khat a ni ve hrim hrim a. Mihring teh nân pawh kohhran leh khawtlanga a inhman dan kha kan thupui a ni mauh a. Sawrkar hnathawkte pawh an pension leh an thiha kan chawimawi dan tlangpui chu – a hnathawha a rinawm leh sûl sutte ni lovin kohhran leh khawtlanga a inhman dan a ni teh daih fo. Chumi a nih loh vêk chuan, an thil neih (assets) atangin mi hlawhtling leh zahawm kan teh tlangpui bawk. Mipui sûkthlêk a hetih miau avang hian an hlawh leh hamthatna dawn phû lohva hausa politician leh sawrkar hnathawkten mipui rilru an rawk rethei a, hausak hluai duhna sawhkhâwk damdawi tawlh hausa ni âwm tak takte kan awm nawk a. Farming luhchilh thar tam takte rilru pawh a dik thei lo fo – thlai engemaw chin teuh a, lei chhuah teuh kha a ni deuh tawp fo mai.
3. Farming-a mi tam ber hlawhchham chhan hi thil dang vang a ni lo, kan mentality dik loh vang a ni. Dawhtheihna nena zir thiam ai chuan mi tih entawna hlawhtlin VE hluai kha kan tum tlat a. College & University atanga farming kaihhnawih rawn zir chhuakte pawhin, practical farming ai chuan an certificate hmanga ofis daihlim hnuaia thla tin hlawh lâk kha an thlahlel tlat zel a. Anmahniin an practice ngam lo tlat fo. Chutiangin a sûr a sa hnuaia thawk thin farmer-te pawhin, kan lo tihthan leh than hnan tawh aia thui hlek han zir belh leh thiam belh tumna kan nei nêp hle. Mahni idea ni lo, midangte idea kan follow thin avangin kan tlo lova, hrehawm a lo thlenin kan kiansan leh sam thin. Khuangleng White Leghorn chanchin social media-ah kan lo hria a, a ngaihnawm hle. Kha Mizo tlangval khan, line Dept hmelhriatsa ar leh varak ni lovin, ama idea liau liau a bawhzui a. Mizote vulh chi tak, ar tui tam a takin min kawhhmuh dèr. A hmunhma han en khan Crorepatti a ni lo tih a chiang a, a teirei peih a, a tui bawk. Chutichuan, Mizo zingah a tih anga tih ve tum kan awm leh nual dawn, a chiang reng. A tam ber chu kan hlawhchham emaw kan tlo lo leh ang. A chhan chu DUPLICATE a tlo thei tak tak lo. Chutih rualin ani anga tei rei peih leh zir chiang taima chu an hlawhtlingin an tlo ngei thung ang. Mi tihdan kan copy a nih pawhin, mahnia originality awmte nemluh belh thiam an pawimawh thin. Tawngpâwng intihhmuh hi Zofate hian kan sim a ngai ka ti. Engpawhnise, kumin chhovah hian Mizo ram mil tak, tlo leh hlawk taka farming kalpui dan tur lan zir chho leh dawn a. Thawhtanni apiangin hemi pual article hi kan lo ngaichâng dawn nia.