SUSTAINABLE, INTEGRATED FARMING IN MIZORAM – 3

RK Dawla
Mb 9366095658

1. Hun a liam zel a, kum a hlui a, a lo thar zel a. Chutiangin kumthar 2026 pawh ni 18 zet a liam leh ta. Khawvel tukverha dâk takzet turin Mizoram pawh a inher dik chho zel a. Hmasawnna ruangâm pawimawh tak tak – zirna, hriselna, inkalpawhna leh ei leh bar ngaihtuah chungchângah hmasawnna thar lawmawm tak tak kan hmu chho zel a. Healthcare scheme tha tak sawrkarin a duang a, zirna lam tihhmasawnna kawnga a bulthut ber, zirtirtu lâk chungchangah pawh bung thar kan kâi a. Kawngpui tha nei turin sawrkarin hma thar a la zel a, Rel kawng chenin kan inchhawp hnai ta hle. Tin, lo neitute thlai thar – Aieng, sawhthing, hmunphiah ilo sawrkarin a leisak a, cash crop hrawl deuh – kuhva leh rubber chenin sawrkarin a ngaihven tih a takin a lang tan a. Hun duhawm takah kan chêng tan mêk niin a lang. Tin, 5G internet hmangin AI khawvelah kan lût fel a. Awlsam zawkin information kan hmu zung zung thei ta a. Lehkhabu ritsak tak tak leh man to tak takte pawh, soft copy kan ti a, man tlawm leh zangkhai zawkin kan ban pha mêk a. Hmasawn tum tak tak tân chuan, fin varna tur thil tam tak awlsam zawkin kan ban phâk ta!
2. Formal a ni emaw Non-formal a ni emaw, zirna hi mihring timihringtu pawimawh ber a ni a. Eng hawizawng maiah pawh hian zirna hi a kalkawng awmchhun a ni lo thei lova. Football leh Hockey pawh a zira zir a ngai a, zai leh làm pawh zir hmasak a ngai a. Zir mumal lovin Doctor-te pawh hi practice ngawt sela chuan, mihring kan hek hle ang. Khawvel a thang zel a, thiamna thar a lo chhuak zel a. Keimahni hmathlâk zawn theuhah pawh thiamna leh hriatna thar man thiam turin kan lo insingsak ve zel a ngai a. Chutia nih loh chuan, kan hluiin kan hman tlâk loh thuai thin. Chutih rual chuan, inpêkna (dedication) a pawimawh tel zel a, eng hnaah mai pawh hian. Thiamna leh hriatna ringawt, inpêkna tel lo chu a tangkai tam thei lova, a hlut tur angin a hlu tâwk lo fo thin. Hna engpawh thawk tura pawimawh pahnih – thiamna leh inpêknate hi kan Farming zinkawngah pawh hian a pawimawh bulthut a ni lo thei lova.
3. Tichuan, kan pi leh pu, kan nu leh pate hunlai aia hun duhawm leh tha zawkah kan ding mêk a. Khawvel dang rual el pha ve turin kan beiseiawm ve ta riau a. Hei vang hian kan tu kan fa, chhuan lo la awm lehzel turte tána hnuhma tha leh chhawrnahawm hnutchhiah turin mawhphurhna rit tak kan chungah a innghat ta a. Zalen takin kan kawng zawh tur kan thlang thei a, kan vannei êm êm. Mahsela, he kan zalenna hian mawhphurhna a keng tel a, he a thil ken tel hre chang lova, India hmarchhak kila lo thawven viau kha a tunlai chiah lo a ni. Tin, tunlai khawvelah chuan Farming hi Classified job a ni a, hriatna leh thiamna bâkah inpêkna thûk tak nên lo chuan, luhchhuah mai mai theih a ni lova, sa hliam chhaihkawlh ang chauhin kan chhuak ho dêr thei a. Sa (farming) kha va hliam chauh tur ni lovin, luhchhuah a, va thal ngei turin engkim kan huam a ngai a.
4. Tin, kan ram hi a kilkhawr a, a rem lutuk lova, mihring kan tlêm a, thil harsa a tam niin kan sawi thin. A dik vek. Mahsela, a harsatna lam ringawt thlir hi thil kawngkal a ni lova. A awlsam dan kan thlir tel a, kan bûk tawn a, kan hrual mûm a ngai zawk a. Khawvela thil thar siam chhuah leh hmuhchhuahte zawng zawng hi, a remchan êm vanga hriatchhuah aiin, a harsat êm vàng zawka hmuhchhuah leh siamchhuah an ni zawk zel a. Mizoramah pawh sik leh sa nuam tak, ruahtui leh leilung danglam bik tak kan nei. Tin, hmun ralmuang takah kan awm bawk a. Kum 2025 chhova tourist kan ngah dan hian, kan remchan lohna hi a remchâng zawk fo tih a tilang àwm e. Tourist spot tha – tuipui kam leh thliarkar mawi tak tak te, building khir leh Super market bawn tak takte nei kher lo mah ila, tourism hi nasa takin kan promote thei tih mipui nawlpui hian kan chiang tlâng viau tawh daih ang chu! Chuvang chuan, himdam leh tlo taka farming kalpui hlawhtling tur hian vawiina farmer-te hian kan ram hian ‘theihna’ a nei a, keimahni zawk hian ‘duhna’ leh ‘tumna’ kan neih a tul chauh zawk a ni!