SUSTAINABLE, INTEGRATED FARMING IN MIZORAM – 4

RK Dawla
Mb 9366095658

1. Mizo History chhui ila, tunlai tluka hun rangkachak a awm kher àwm love tih khawpin hmasawnna leh changkanna khawvel tukverh-ah kan ding mêk a. A thawk thei leh peih tân chuan, thlai chin tur thlan kawngah pawh tunhmaa kan dinhmun ngawt ai chuan, zalenna leh remchanna tam tak kan nei tawh zawk a. Kan khawvel hi kan thlir danah hian a innghat thui khawp mai. Mi tam tak chuan kan hun hi anchhia kan lawh a, chhuanlam chi hrang hrang hmuchhuakin, kan hlawhtlin ve theih loh chhan mawhpuh tur kan hre viau thin. Mahsela, mi thenkhat erawh chuan, harsatna leh remchanlohna phêna remchhanna inthukru hmuchhuak turin chhuanlam rêng an ngaihtuah ngai lova. Ding takin an pan a, a kalkawng bum boh mah se, an tumah an chian tlat avangin hlawhtlinna an pal baw nge nge thin. Line dang ang bawkin Farming pawh hi a thei leh hriam apiangte chauh dinchhuahna tur tho a ni a. Mi zawng zawng hian chhungkaw intodelhna leh hmasawnna khawp tharin kan hlawhtling vek dawn lo. Hlawhtlinna hi mi zawng zawng tân ni mah se, a hun tak leh a tul anga a man pe peih kan tam thin lo. Hei vang hian hlawhtlinna hi mi zawng zawng tân a thleng thei lo thin. He thudik hriam tak hian a chhawk then zingah kan tel dawn nge dawn lo tih chu kan duhthlanna a ni e.
2. Kan nu leh pate hun lai kum 20/30 liam ta khan zirna an nei chhe zawk a. College pawh 2/3 lek kan nei a. Mahsela, khang hunlai khan Central Service-ah an inziaktling nual thei tlat. Tun hnu-ah, thingtlang kilkhawrah pawh English Medium sikul kan neih fir fer tawh hnu hian, India rama zirna kawnga inelna lian thamah inziaktling lan awm thei ta mang hlek lo mai. A chhan tam tak awm thei zingah kan rilru puthmang (mentality) a inthlâk kan ti thei ang. College leh University degree tha pui pui kan nei a, Competitive exam hmachhawn aia sawrkar hna chhe tê tê-a political appointment deuh roha luh tum tâwk lekin kan degree chuan min siam a. Prelims exam ve zuai, main exam paltlang hlei thei lo, beidawng ta kan tam fê tawh ang. Engatinge tunhma kan tluk theih loh? Kan pi leh pute hunah khan ei leh barah an intodelh thuak thei kum tin a. Tunah anni aia fing zawk, remchanna nasa zawk leh hmasawnna nasa zawk nei si hian kan pi leh pute mentality pawh kan phâk lo a ni zawk mai em? Manipur leh Burma angin politics thilah kan ram a buai azeng pawh ni si lo! Kan nêp tih inhriatchhuah hmasak hi rahbi dik rap tura kan thanmawhbâwk chu a ni zawk lo’m ni?
3. Hun harsa hian mihring tha zawk a chher chhuak fo thin a, hun ralmuang leh nuam hian mi thatchhia, hlemhle leh pangchang a chher chhuak fo thin. Hun ralmuangah pawh thinlunga turna leh rualelna chuan, hun leh hmun khirh zawkah mihring pangngai chu a cocoon-tir thin a, hun leh hmun tha zawkah, dinhmun tha zawk nên mihring a siam tha thin. Covid hripui khan engemaw chenah Mizote min chher hriam a, mihringte dam khawchhuah nân ei leh in tur a pawimawhzia a hnam angin min hriatchhuahtir nasa hle niin a lang. Hei vang hian khawpui paho zingah pawh farming lama mi tui thar tam tak an awm thar mawlh mawlh a. Farm lian leh changtlung tak tak din tumin hma an la nasa hle. Lirnghingin a säwi chhiat leh mai mai hlauhawma building khir tak tak sa a, in luah tur kaw engemaw zat duan ai chuan, countryside-ah, tlo leh daihrei tur, tu leh fate rochun zel tlâk farm tha tak din tumna rilru pû mi tam tak kan awm thar hian, hmasawnna kalkawng dikah kan ram a hruai mêk tih hi phat rual a ni lo. Tin, hrisel nân hrim hrim pawh nature hnaih thei ang bera thlan tlaa nun hman tam hi a pawimawhin, hlimna kuhmûm a ni tih a takin a chiang thin. Kan hun tha hi keimahni leh kan ram tán, a tangkai thei ang bera hman kan ba e.