SVB depositor te tan buaina awm lo ti

Mipui leh sumdawngte US bank tlachhia Sillicon Valley Bank (SVB) a sum dah te chuan Thawhtanni atang khan an sum dah te an lakchhuah tan theih thu US sorkar chuan a sawi.
US Treasury, Federal Reserve leh Federal Deposit Insurance Corporation (FDIC) te chuan depositor te sum chu humhim thlapa a awm tur thu an sawi a.
Bank tlachhia avang hian taxpayer ten engmah hloh an nei dawn lo, tiin thuchhuah an siam chuan a tarlang bawk a.
SVB te hi kar kalta Zirtawpni khan thuneitute chuan kharsakin an assets te khawih chet theih lohin an dahsak zui nghal a. Kum 2008 financial crisis hnua US bank tlachhia lian ber a ni zui bawk.
SVB tlakchhiat chhan hi echn lender an rinrawl tena interest rate sang tak avanga asset an hralh atanga hloh an neihte khuhna tur sum an hmuh mai theihloh vang a ni a.
“US banking system chu a ngelnghetin a insawhnghet a, financial crisis thlen hnuah banking industry te humhim a nih theih nana hmalakna avangin a ngelnghet a ni” tiin thuneitute chuan thuchhuah intawm an siamah an tarlang.
“Depostior te saving humhim a nih theih nana kan hmalakna avangin himdam takin engkim a awm a ni,” an ti zui bawk.
SVB lovah hian Signature Bank of New York pawh tlachhe mai thei dinhmuna ding nia ngaih a ni bawk a. Thuneitute chuan emergency fund hman mai theiha a awm theih nan bank te chu ruahmanna thar an siampui bawk a.
Federal Reserve te chuan Bank Term Funding Program kalpui tharin he mi hmang hian bank tena harsatna na tawha sum awlsam zawka an puk theih turin hma an la a ni.
President Joe Biden chuan American mipuite chuan an bank a sum dah te chu an duh leh mamawh hun apiangah an lachhuak thei dawn tih hrechiang em em rawh se tiin a sawi zui bawk.
SVB te hi tech sector bikah sumdawng bultan tirte tana nasa taka thawktu ni thin a ni a. US venture-backed technology leh healthcare company te nikuma stock market luhchilh te nen hun rei tak thawk dun tawha banking partner ni reng tawh an ni bawk.
SVB hi kum 1983 khan California bank-a bultan niin hun rei lo te chhungin an lian chak hle a. Mahse, interest rate sang tak phut a nih hnuah start-up te tan private fund raising emaw share hralh emaw a tihar em em zui ta a ni.