Bangladesh a Rohingya camp hal luih ngei ti

Kar kaltaa khawvela refugee camp lian ber Bangladesh-a Rohingya refugee camp kang chu tihluih ngei tiin investigator te chuan an sawi.
5 March khan kangmeiin Rohingya refugee camp chenna in sak lailawk 2,800 kang chhe vekin mi 15,000 te chu chenna nei lova siamin an awm a ni.
Bangladesh sorkarin chhui chiang tura a tihte chuan militant group ten he camp hi an hal tiin an sawi a. A rualin camp chhung hmun hrang hrangah kangmei a chhuak rual a, ruahman lawksa veka thiltih a ni, tiin Abu Safian chuan a sawi.
Nunna chan erawh an awm lo hlauh a, kangmei hian infrastructure network – school, medical clinics leh service points hrang hrangte a kangchhe vek a ni.
Kangmei chhuah chhan zirchiang tur hian Bangladesh sorkar chuan mi pasarih awmna dinin kangmei chhuah dan mita hmutu mi 150 an kawm chian hnuah Pathianni khan report an theh lut zui a ni.
Committee chuan he kangmei tichhuaktu nia ngaih pawl te chu chhui chian ngei ni se an ti zui bawk a. Kangmei kha Cox Bazar-a Camp 11 ah chhuak tanin tlai lamah thunun theih chauh a ni.
Cox Bazar-ah hian Myanmar atanga sipai te hlaua tlanchhia Rohingya refugee maktaduai khat chuang an cheng mek a.
Mau leh plastic sheeting a siam chenna in siam lailawkah an cheng mai a. Mi cheng an tamin kangmei chhuah hlauhawm takah an awm reng a, kangmei a chhuah pawhin chenna a inhnaih si a, gas bur puak ten rang takin kangmei a tipunlun zui tia sawi a ni.
January 2021 atanga December 2022 chhung khan Rohingya camp-ah hian kangmei tum 222 a chhuak hman a, heng zinga 60 te chu tihluiha hal tiin Bangladesh defence ministry chuan thla kaltaa report an siamah an tarlang.
March 2021 pawh khan kangmei avangin mi 15-in nunna chanin mi 50,000 chuangte chenna a kang chhe vek tawh bawk.