Swiatek hmakhalha World No. 1 luahkir Sabalenka

Swiatek hmakhalha World No. 1 luahkir Sabalenka
Tunhnaia Wuhan Open trophy chawitu Aryna Sabalenka chuan Iga Swiatek zuankhumin WTA ranking-ah a sangber a luah chho ve leh ta a, thla thara hmeichhe season kharna Saudi Arabia rama khelh tur WTA Finals hi world number one ni chunga kum khar tur zawk zawnna hnuhnung a ni tawh ang.
Belarusian Sabalenka hian season a hmang nuam hle a; kumtir January thla khan Australian Open title a kawl lai humhimin, thla hmasa mai khan a trophy cabinet-ah US Open trophy a chhunluh belh a; Cincinnati leh Wuhan-ah a champion leh bawk.
Player-te hi an fit a nih chuan a lo berah pawh kum khat chhunga WTA 500 event paruk tal khel tling ngei tura tih an ni a, mahse, Swiatek hian a chauh tawngkhawng chhuanlamin Asian tour a rawn chuangchhuak zo lo a, kha vang khan French Open champion hian tun season-ah WTA 500 event pahnih chiah a khel dawn ta tihna a ni.
WTA danin a phut ang a puitlin zawh tak loh avangin Swiatek hi hremna pek a ni a, Sabalenka of Belarus pawh WTA 500 event vawili chiah a khelh avangin hremna tawk ve tho dawn mah se Swiatek chungah a chuang zui ta tho a ni.
Nikuma Swiatek-i’n a rawn pawhthlak hma khan Sabalenka hian season liamtaah chawlhkar riat chhung teh meuh ranking ler a thut hman a, season-ending WTA Finals-a a hnehna sualchhuah hmangin Pole chuan No. 1 nihna nen kum a khar phah ta zawk a, kumin pawh hian season liamta ang bawk khan thil a thleng leh lo ang tih a sawilawk theih loh a, Saudi Arabia rama kum kharna tournament-a a champion leh a nih chuan Swiatek hian a hum ngai luah chungin season a hmangliam leh lo ang tih sawi theih a ni lo!
He boruakah hian world number one dinhmun chang chho leh ta rih Belarusian chuan hun rei zawk ‘N1’ a luah ngei a beisei thu a sawi.
Thawhtannia ranking thar tarchhuah a nih hnu khan X-ah Sabalenka hian a duhna chu a tlangaupui a, eng chen nge Swiatek hian a chunga chuang awmchhun hi a enliam theih dawn kan thlir ang!
Tunkar chhunga chechhuak bik lo Sabalenka hian ranking point 9,706 kawl mekin, Swiatek (9,665) nena an inkar a zim hle a, point 1,500 ruh theihna Finals an hmabak mek hian world number one ni chunga kum khar tur zawk a hril dawn a ni.
Tarlan tawh thin angin, hmeichhe tennis kum kharna WTA Finals hi November ni 2-9 chhungin Saudi Arabia khawpui Riyadh-a hard court-ah khelh a ni dawn a; top eight singles player-te bakah top eight doubles team-te an inel thin a nih ngai kha.