Swiatek kutah Cincinnati Open title lut ve ta nge nge

Lindner Family Tennis Center-a Thawhtanni Cincinnati Open final-ah Grand Slam title paruk hawn tawh Iga Swiatek chuan 7-5, 6-4-a Jasmine Paolini hnehin a vawi khatna atan Rookwood Cup a chawi ve ta nge nge.
He hnehna hmang thian Pole third seed chuan US Open-a hmeichhe singles title lak ve tumte tan tawntlang phawt ngai a nih turzia a pholang.
Thawhtanni hnehna kha a career-a WTA 1000 title 11 a lak tlinna ni tawhin, nikum Italian Open hnu lama a vawi khatna a ni thung.
Ti hian, WTA 1000 format history-a champion hnem pahnihna niin, a tluk loh awmchhun Serena Williams (23) nen erawh an inthlauhna a la sang deuh rih.
Hnehna a chan hnuah Switek chuan a team-te chungah lawmthu sawiin, ball sawt rang zawk khelmualah pawh heti a lo nih chhoh theihna kawngah an nawr hram hramna leh player tha zawk ni tura an zirtirnaah a lawm takzet tih sawiin, hardcourt lam thlenga a champion chho ve ta zel chu mak a tih hial zawk thu a tarlang tel.
Cincinnati-a a champion avang khan Wimbledon champion Swiatek chuan WTA ranking tharah world number two a luah chho leh dawn a, kum khat chhunga major tournament hnuhnung ber Pathianni atanga Flushing Meadows-a khelh tan turah pawh hian second seed a chang bawk ang.
Singles main draw hmaa lo khelh hmasak tur US Open mixed doubles event-ah Swiatek hi Norway star Casper Ruud nen an inkawp zui bawk.
Tarlan tawh thin angin, kumin US Open mixed doubles event hi singles main draw hmaa khelh zawh tur niin, August ni 19-20 chhung awh lek turah hian pair 16 inlan tura tih an ni a, nimin atanga khelh tan niin, Thawhlehniah round hmasa pahnih khel zoin, vawiin, Nilaini hian semi-final leh final an tlak fel nghal dawn a ni.
British number one pahnih Emma Raducanu leh Jack Draper-te chu inep tura fixture siam niin, kum 22 mi Raducanu hi five-time Grand Slam winner Carlos Alcaraz nen inkawpin kum 23-a upa Draper hi American Jessica Pegula nen an tangdun ve thung.
A tirah tak chuan Raducanu hi Tommy Paul nena inkawp tur niin, Draper hi Paula Badosa nena tangdun tur an ni ve bawk a, mahse, pahnih hi an inhnuhdawh leh ta avangin midang nen an insiamrem zui ta a ni.
Kumin February thlaa mixed doubles competition kalphugn thar puan a nih hnu khan organiser-te chuan nasa taka sawisel an hlawh a, mahse, top singles player-mixed doubles bik hi a hlung lo deuh thin a, chu mi tihtawpna atan chuan ruahmanna thar an duangchhuak ta a ni.
Pair 16-tew hian Flushing Meadows-ah US dollar maktaduai 1 (£749,077) an inchuh a; tu pawh lo champion se top player hraw ber berte an inlan avang pawh hian hlawhtling thawkhat tawh chuan a lang!
Tarlan tawh thin angin, he two-day tournament-ah hian kum 2021-a US Open title latu Raducanu chu Spaniard Alcaraz nena tangdun turin wildcard entry pek an ni a, nimin an bultanna inkhela Jack Draper leh Jessica Pegula inkawp an hneh leh hneh loh tarlan hman a ni ta lo.
Kum 24 mi Italian Sinner pawh wildcard entrant bawk niin, a kawppui tura tihfel tawh American Emma Navarro a inhnuhdawh avangin Czech Katerina Siniakova nena tangdun tura tih a ni a, mahse, Thawhtanni Cincinnati Open final-a nawmsam loh vanga a inhnuhdawh hnuah nimin mixed doubles a khel thei ta chiah em tih tarlan hman a ni lo bawk.