A thisena damdawi hman phal loh a awm leh awm loh endikna a hun taka a kalpui zat zat loh avangin kum li chhung atana eng inelna mah hmachhawn thei lo turin kum 24 leka upa American Olympic swimmer Michael Brinegar an hrem.
United States Anti-Doping Agency (Usada) thuchhuahin a tarlan danin Brinegar hian kum 2022 July atanga September thla chhung khan a Athlete Biological Passport-ah ‘blood doping’ tih hun tur a bawhpelh fo a, amah chuan thisen endikna hian a thisenah normal lohna (abnormal blood values) a thlen nasa tih sawiin, hei hi endikna a pumpelh chhuanlam a ni a, mahse, thuneitu lamin an pawm i khaw lo a, kum li chhung teh meuh atan an phuarhlawm ta a ni!
Brinegar-a chungchang ngaihtuahtu independent arbitrator chuan a chet danah thiamlohna a hmu lo a, mahse, Usada lamin roreltu thutlukna siam chu sports thuchhe remna sangber Court of Arbitration for Sport-ah khingletin, CAS hian hremna na tak a tichhuak ta a ni.
Heti a nih takah chuan Tokyo Olympics 800m leh 1500m event-a lo inlan tawh Brinegar hian Paris 2024 US team-a tel tur zawnna hnuhnungber Pathiannia zawh fel turah hian tui a hleuh thei dawn ta lo a, a kirleh theih meuh chuan a vang lai a pel duai thei hialin a rinawm!
US Olympian hlui Jennifer Hooker-a fapa Brinegar hian thiam lohna a neih loh thu sawiin, “Olympian ka nihna leh US women’s team tana East German team lo hmachhawn tawh Olympic swimmer fapa ka nihna zawnah phal loh thil tiru lo tura zirtirna dawng tha tawk ka ni ve a, chu chu ka dinna pawh a la ni reng.
“Court of Arbitration for Sport thutlukna hian min tilunghnur hle a, Usada min puhna pawh hi behchhan awm lo a ni,” tiin Instagram lamah thiamthu a sawi.
Swimmer Brinegar an hnawtchhuak
Get real time updates directly on you device, subscribe now.
Next Post