Swiss Open second round lut Srikanth leh Sen
Swiss Open second round lut Srikanth leh Sen
Champion hlui Kidambi Srikanth leh tunlaia chetha tak Lakshya Sen-te chuan Nilaini khan Basel khawpuia Swiss Open super 300 badminton tournament khelh mekah men’s singles 2nd round an lut.
World no. 1 hlui Srikanth hian kum 2015-a Basel title a lo lak ve tawh chhunzawm turin bul a tan fuh a, minute 43 lek chhungin first round-a a khingpui world no. 24 Wang Tzu Wei lakah 21-17, 21-18 hnehna changin, Chinese Taipei player nena tum sarih an intumah vawiruk a chak tling ta a ni.
2011 world championships silver medallist Srikanth hian inkhel hautak zawkah Malaysian top seed Lee Zii Jia a su zui leh.
Nilaini inkhel dangah tunhnai chawlhkar hnih liamta chhunga French Open leh All England Championship lama semi-final thleng ve ve Sen pawhin a Malaysian tumpui Leong Jun Hao lakah minute 62 chhungin 21-19, 15-21, 21-11 hnehna a sualchhuak a, round hnihnaah Chinese Taipei player Chia Hao Lee nen an intum zui.
Double Olympic medallist PV Sindhu pawh hmeichhe singles second round lut zingah telin, Thailand mi Pornpicha Choeikeewong lakah 21-12, 21-13 hnehna a chang a, Japanese Tomoka Miyazaki nena third round luh inchuh result tarlan hman a ni lo.
Sindhu hian kum 2022 khan Swiss Open super 300 badminton tournament title a lo hlawhchhuak ve tawh.
Women’s doubles lamah seeded sixth pair Tanisha Crasto leh Ashwini Ponnappa chuan Indonesia nula inkawp Meilysa Trias Puspitasari leh Rachel Allessya Rose lakah 21-18, 12-21, 21-19 hnehna changin, world no. 20 Indian pair hian Japanese pair Rui Hirokami leh Yuna Kato an tum leh ang.
Basel khuaa Indian pair inlan dang Priya Konjengbam leh Shruti Mishra pawhin women’s doubles match dangah Chinese Taipei lam mi Huang Yu-Hsun leh Liang Ting Yu tangdun chu 21-13 21-19-in an vaw tla ve bawk.
Thawhlehni daih tawh khan Indian shuttler dang Treesa Jolly leh Gayatri Gopichand inkawp pawhin women’s doubles second round an luhna kawngah 21-15, 21-12-in USA pair Annie Xu leh Kerry Xu an lo hneh ve tawh bawk a ni.
Women’s doubles main draw 1st round-ah hian Indian pair pathum an tla fel tawh thung.