Swiss summit-ah Ukraine thlawp tlatna

Ukrainian territory atanga Moscow a inhnuhdawh chuan naktukah Kyiv chuan Russia nen peace talks a nei nghal ang tiin Ukrainian President Volodymyr Zelensky chuan a sawi.
Switzerland a peace summit kharnaa thusawina a neihah Russian President Vladimir Putin chuan indona chu engti kawng mahin a titawp dawn lo chuvangin military emaw diplomatic hmangin emaw a theih dan angin kan tihtawp a ngai a ti thung.
Khawthlang tanpuina ringawt chu indonaa chak nan a tawk lo tia sawiin mahse summit neihna chuan khawvelin Ukraine a tlawpna chu a zuai lo tih a pholang a ni a ti bawk.
Swiss summit a tel ram tam tak te chuan Ukraine territorial integrity humhim tlat turin hmalak zui zel ni se an ti bawk a.
Final document chuan indonaa tawrhna nasa tak awm mek leh chhiatna a thlenah Russia chu an dem hle bawk a. Mahs,e he summit a tel zingah India, South Africa leh Saudi Arabia te chuan hming an ziah hnan ve duh lo thung. He summit ah hian khawvel ram hang hrng leh international organisation hrang hrang 90 chuang an tel a ni.
Russia chu sawm a ni ve lo va, amah thlawptu lian ber China pawh sawm an ni lo bawk.
Swiss resort Burgenstock a pungkhawm zingah hian Ukraine thlawp kher lote pawh telin Saudi Arabia te pawh an tel tho va, tun hnaia Russia hrekna dodal zawnga sawi nei Kenya te pawh an tel tho bawk.
Summit final document chuan tuna Russia in a apw mek Zaporizhzhia nuclear power plant chu Ukrainian thununna hnuaiah dah tur a ni an ti bawk a. Russia runna chu ‘indona’ tia sawi a ni bawk a, chu chu Moscow erawhin a hnawl thung.
Lung in tang inthleng tawnna siam ni se, Russia chuan Ukraine naupang a rukbote chu a chhuah tur a ni an ti bawk a. Thu inchuh nasat ber Russia-in ram a awp chungchang chu nakina la sawiho tura dah a ni thung.
Zelensky chuan world leaders te hnenah lawmthu sawiin Russia in nasa taka a nawr chung pawhin independence taka chet an la chu lawmawm a tih thu a sawi a. “He summit hian khawvelin Ukraine a thlawpna a zuai lohzia a pholang a ni” tiin a sawi.
Zelensky chuan ‘Kan ram atanga a inhnukdawh a nih chuan Russia chuan naktukah inremna a awm theih nan inbiakna neih nghal a ni ang’ tiin a sawi a. Hei bakah hain Zelensky chuan China chu Ukraine hmelma a ni lo a ti bawk a.
“China leh a territorial integrity kan zahsak a, chutiang bawk chu China atanga kan phut let a ni” tiin a sawi bawk.
Dutch Prime Minister Mark Rutte chuan summit a tel te chuan Ukraine in remna leh muanna a neih chu an duh ber tiin a sawi a. “Kan vaiin inremna a awm theih nan bul kan tan chauh tih kan hria,” a ti a.
“Dawhkan kiltute zingah Ukraine-in remna leh muanna a neih theih nan ngaihdan inang lo kan awm ngei a. Mahse, kan principle, values leh zahawmna kawngah kan lungrual a ni,” tiin a sawi a.
“Ram dang i run ngawt thei lo, naupang i ru bo ngawt thei lo. Khawvel food supply behchhanin politics i khel ngawt thei lo, nuclear safety derthawngah i siam ngawt thei lo,” tiin Rutte chuan a sawi.
Zelensky chuan Swiss summit a thutlukna siam chu Moscow hnenah hriattir a ni ang a, chu mi hnuah summit tum hnihna chuan indona tihtawp a nih theihna turin thulukna mumal zawk a siam tawh ang a ti.
Russia chuan Swiss event chu hun khawhralna mai mai tia sawi thungin kar kalta Zirtawpni khan President Vladimir Putin chuan Russia in Ukraine ram a awp mek atanga Ukraine sipaite an inhnuhdawh chuan inkahhai a remti ang a ti.
Mahse Putin thusawi hi western leader te chuan an hnawl nghal a. Italian Prime Minister Giorgia Meloni chuan ‘propaganda’ tihsakin UK Prime Minister Rishi Sunak pawhin Putin chu na takin a dem bawk.