Synod-in Sakramen atan a ngai hman rel

Chawlhni zan thlenga neih Mizoram Presbyterian Kohhran inkhawmpui sang ber Synod Inkhawmpui chuan Sakramen atana wine hman mek chu hman zel an rel. Inkhawmpui rorel inkhawm tawp ni, Inrinni khan Synod Executive Committee (SEC) te’n hemi chungchang an zirchianna an thlir a, SEC-in rawtna pathum an neih zingah “Kan kohhranin Sakramen wine-a kan hman lai Tincture Cardamom wine chauh hi hman zel ni se,” tihah thu an titlu a, “Grape tui Sakramen-a hman chungchang’ (Synod 2022:9; SEC 301:20; OM 11:11/2023; OM 19:7/2023; SEC 303:31) chu ruahmannate ngaihthlak a nih hnuah kan hman ngai hi hman chhunzawm ni se, tih a ni,” an ti.
SEC zirchiannaah hian Baptist Kohhran-in Sakramen atana an hman, Mizorama siam wine hi bazar-a zawrh Zawlaidi/Champwine nen a inang lo a, Sakramen atana siam hi chu dawrah zawrh a ni lo a, grape tui fir engmah pawlh loh atanga siam a ni a, chini leh a thawh hmana enzyme pawh telh a ni lo a, a siamna bungbel leh hmanruate pawh tawngtaia serh hran thlap a ni tih a lang.
Hei hi kohhran pawl dang leh mimalin lo duh ve ta se a siamtu Champhai winery leh Baptist Kohhran phalna lak phawt a ngai an ti.
Mizorama siam Sakramen wine bottle hi ml 750 dawng a ni a, Presbyterian Kohhranin hmang dawn ta se kum khatah bottle 13,000 atanga 15,000 vel mamawh a nih tur thu leh winery lamin kum khatah bottle nuai hnih atanga nuai thum vel an siam theih tur thu te zirchiannaah hian a lang. Presbyterian Kohhranin an hman mek Tincture Cardamom wine hi um khat ml 450 dawng, Rs 375 man a ni a, Mizorama siam hi um khat ml 750 dawng, Rs 230 man a ni tih te, Mizorama siam hi tui pawlh lova in nghal tur a ni a, Tincture Cardamom wine hi um khatah tui litre 3 leh chini engemaw zat pawlh belhin a la hmantlak tih te a lang bawk.
“Tincture Cardamom hi thingtlang kea kal tulna Pastor bial zau deuhva awmte tan chuan a ken leh dahthat velah chuan remchan zawkna tam tak a awmin a lang,” tiin zirchiannaah chuan an ziak.
Inrinni-a thurel zingah jail tang chhuakte chawlh lailawkna siam chungchang a tel a, a thar din lovin a lo din tawh sate thawhpui ni se tiin an rel.
Worship Executive Committee hnuaia Worship Cell-in inkhawm kalhmang chungchang an zirchianna pawh an thlir a, a zirchiangtute rawtnaah hian “Urhsun taka inkhawm leh zangkhai leh hlimawm deuh zawka inkhawm dan kawng zawn ni se” tih te, “Rimawi hmanrua hmanah te leh inkhawm kalpui danah thangtharte ngainat zawnga kalpui kawngah inhawng zau deuh ila’ tih te, “Inkhawmah mipui chanvo tam zawk siam dan kawng zawn ni se” tih te a tel.
December ni 1-10 chhunga neih Synod Inkhawmpui hi a a vawi 100-na a ni a, Mission Veng Kohhran biak ina neih niin, Inrinni khan chhunah ro an rel zawh hman loh avangin zan inkhawm banah ro an rel chhunzawm a ni.
Chawlhni chawhma khan Pastor nemngheh leh Pro Pastor ruatna inkhawm an nei a, chhun inkhawmah Moderator Rev R Vanlalnghaka’n Lalpa Zanriah Sakramen a theh a, Pastor boral sunna hun an hmang. Zan inkhawmah Moderator kalchhuak Rev Dr C Chawnghmingliana’n thuchah a sawi. Nakkum Synod chu Mission Vengthlang Kohhran biak inah neih a ni ang.