T-shirt 137 ha chunga km 21 tlanin record siam

Guinness World Record siam lama mikhual lo tak, tum khata record title kawl hnem ber record siamtu ni mek, David ‘Record Breaker’ Rush chuan record a siam leh ta a, tun tuma a record siam chu T-shirt half marathon (km 21) tlana kawr hakthuah hnem ber record a ni.
Hetiang record hi 2019 khan amah, David-a hian a lo siam tawh a, chumi tum chuan kawr 111 hakthuah chungin half marathon a tlan a, mahse, a record hi midangin T-shirt 127 ha chunga half marathon tlanin an rawn khum a, tumah hian T-shirt 137 hakthuah chunga half marathon tlanin record a rawn siam leh ta a ni. A T-shirt hak zawng zawng hi pound 48 (kg 21.7) a rit a ni.
David Rush hian nikum khan Idaho Potato Half Marathon-ah record siam a lo tum tawh a, mahse, hemi tum hian T-shirt 114 a ha hman tawh tihah a nghawng a rek na lutuk a, a thisen kal vel a tibuai thei dawna a lan avangin a pamtul a, kuminah he marathon-ah tho hian T-shirt 137 ha chunga tlanin record a siam ta a ni.