T20 atangin Kohli leh Rohit te an chawl

Inrinni zan khan Twenty 20 Cricket World Cup final khelh a ni a, Kensington Oval a inkhel hmuhnawm takah India chuan harsa takin South Africa an hneh a, a vawihnih nan T20 World Cup-ah an champion. T20-ah an champion hnuin India player langsar pahnih; Virat Kohli leh Rohit Sharma ten T20 Internationals an chawlhsan zui nghal.
Final-ah hian India in an vaw hmasa a, bul tan tha lo mah se a tawp an khar tha thawkhat. Champion ngei tuma inlan India hi over tir lamah an out zawn nghal a, India tantute thin a phu rang hman hle. Derthawng takin bul tan mah se Virat Kohli hun a thleng a, ani hian India beiseina a kaiharh thar leh. T20 internationals chawlhsan zui tur Kohli hian ball 59 a hmachhawn atangin run 79 a siam. Axar Patel chuan ball 31 a hmachhawn atangin run 47 a siam ve bawk. India hi over 20-ah mi pasarih an out a, run 176 an siam.
India in an vuak zawh hnuin South Africa in an vaw chhunzawm ve leh nghal a, anni pawhin bul an tan tha tawk lo. Run siam tam hman lovin pathum an out nghal. Bul tan tha lo mah se an insiamtha a, run khawl keuh keuh in, an target an hnaih zel. South Africa in an vaw tha chho a, champion theihna hun tha an neih laiin India tana ball vawmtute an chetha ve thung. South Africa hi champion thei dinhmuna an din laiin India ball vawmtute an fimkhur thar leh a, inumphak tir em lovin over 20 an hmang tluan thei hram. South Africa hian over 20-ah mi 8 hloh chungin run 169 an siam a, India hi run 7 in an umphak lo va, India chu T20 champion thar an ni a, kum 13 chhung zet an nghah hnuin trophy lian an la.
Inelna lianah India an champion pui hnuin India player pawimawh pahnih; Virat Kohli leh Rohit Sharma te chuan T20 international match an chawlhsan zui nghal. Final hmuhnawm takah man of the match a thlan Virat Kohli hian T20 International match ah run 4,188 a siam a, record ropui tak nei chungin a chawl dawn. A ruala chawl ve nghal tur Rohit Sharma hian India tan T20 ah vawi 159 khelin, run 4,231 zet a siam tawh bawk.