Table lerah Inter kirleh

Karliamta Zirtawpni khan 2-1-a mualneitu Monza hnehin khelh 14-a point 35 nen Juventus chuan Serie A table-ah a chung ber an luah chho a, Pathianni zanah sithum faia mualneitu leh champion lai Napoli hneh chungin Inter Milan chuan an hmahruaina an neikir leh.
Naples khaw inkhelah hian chawlhlawk dawnah Hakan Calhanoglu chuan hla derh dawrh atangin mikhual hmahruaina goal chhuihlutin, second half minute 61-ah Nicolo Barella chuan belhchhahin, minute nga chauh awm tawhah Marcus Thuram chuan Juan Cuadrado siamsak atangin Inter goal thumn aleh he match-a goal lut hnuhnungber ni zui ta a khung a, champion lai Napoli an hniam belh zel!
Thla hmasa mai khan Napoli hian manager thar atan Walter Mazzarri an senglut a, team chhunga inthlakdanglamna lian pawhin an dinhmun a la chawikang zo mai lo a, khelh 14-a point 24 nei chungin table-ah pangana an luah thla a, chuti zat point kawl ve tho AS Roma lakah goal difference tehna hmanga an hniam zawk vang a ni.
Champion lai Napoli hi season liamta league-a an tlawmna zat chiah vawili kha season kal laiah hian tlawm tling der tawhin, hmahruaitu Simone Inzaghi team lakah pawh point 11 zetin an hniam tawh a, an title kawl lai humhim tur chuan insiamthat hle an ngai dawn niin a lang!