Taekwondo referee seminar
Mizoram Amateur Taekwondo Association (MATA) buatsaih 35th State Level Taekwondo Referee Fresher & Refresher Course/Seminar chu karliamta Zirtawpni khan Republic Vengthlanga MATA Hall-ah tan niin, MATA Chief Technical Director Master VL Sawma’n a hawng a, a tuk, Inrinniah chhunzawm niin, zawh fel nghal a ni.
Hawnna inkhawm hi Referee Chairman F. Laltanpuia’n a kaihruai a; Rev. V. Lalnienga’n seminar hlanna hunserh hmangin, inkhawm uaptu MSSC Joint Secretary Lalthanpuia’n fuihna thu a sawi.
Seminar-ah hian World Taekwondo competition rules thar ber zirho niin, mithiam leh tawnhriat ngah pahnih international referee Master Joseph Thansanga leh national referee R. Lalchhandamate’n zirtirna an pe a, club hrang hrang atangin referee 38-in seminar hi an chhim.
Kharna inkhawm hi MSSC Vice President Dr. Hmuchhuaka leh MSSC Senior Sports Promotion Officer R. Lalrinmawiate’n an hmanpui.
Referee Seminar uaptu Dr. Hmuchhuaka chuan referee pass chhuak tharte leh refresher beitute chu an thiamnate Mizo tan leh ram tana hmangtangkai turin a fuih a; ruihlo laka fihlimin, Pathian ttih chunga an thiamna tipung zel tur leh taekwondo game-in a ken tel hawihhawmna te, rinawmna te, tih tak takna te, mahni inthununnate vawng tlat turin a fuih bakah khawvel huapa inelna sang zawka inkhel enkawltu ni ngei turin state referee pass chhuakte duhsakna a hlan nghal bawk.
Ni hnih awh State Referee Seminar-ah hian club hrang hrang atangin referee 38 tel zinga pasarihte chu fresher niin, a dang 21-te chu refresher an ni a; refresher zinga pariatte chu national referee qualify an ni bawk.
Seminar hi theory leh practical-a exam an beih hnuah exam titha bik mi pangate hnenah lawmman hlan an ni.
Seminar kharna inkhawm hi MATA Sr. Vice President Master VL Sawma’n a kaihruai a; MATA General Secretary Joseph Thansanga’n report pein, MSSC Sr. SPO R. Lalrinmawia leh CH. Vanhmingthangate’n fuihna thu an sawi a; MATA Secretary F. Thangtinliana’n lawmthu sawina hun a hmang bawk.
Exam titha Top 5-te
1st – Lalthlamuanpuia Venghlui
2nd – Vanlalhmangaihthangi Armed Veng
3rd – Vanlalmawipuia Venghnuai
4th – Felix Jason Hmingthanmawia, Electric Veng
5th – Fabian Lalduhawma Bilkhawthlir