Taekwondo State Referee Seminar Lungleiah
September ni 27-28, 2024 chhung khan Lungleia SAI Extention Centre-ah State Level Taekwondo Referee Seminar vawi 36-na nghah niin, mi 23-n tha takin an zirchhuak.
Lunglei district hian State Level Referee Seminar an thlen vawikhatna niin, ngaihhlut pawh a hlawh hle a; Lunglei bakah Hnahthial, Lawngtlai leh Siaha district atangin official engemawzatin an chhim.
Referee seminar-ah hian international referee leh tawnhriat nei tha Master Joseph Thansanga’n zirtirna a pe a; World Taekwondo competition rules thar ber zirho niin, theory leh practical exam an nei nghal a; state referee exam zinga titha ber chu Lalnuntluangi, Lunglei niin, pahnihna chu Lalruatkima, Lawngtlai a ni thung.
State Referee Seminar kharna inkhawm hi Lunglei District Amateur Taekwondo Association president Lalthansanga’n a kaihruai a; Lunglei DATA Technical chairman Joseph Lalsiama’n report pein, Lunglei DATA secretary Lalnghakliana Sailoin lawmthu a sawi.
Colour belt exam
2nd session colour belt exam kal mekah karliamta Inrinni khan Lunglei leh Mamitah exam buatsaih a ni a; Lunglei district tan SAI Extention Centre-ah colour belt exam an buatsaih a, mi 16-te’n exam beiin, Master Joseph Thansanga leh Ruthi Lalneihhluite’n exam hi an endik.
Hemi ni vek hian Mamit Bazar hall-ah Mamit district leh khaw thlang lam tan taekwondo belt exam hi buatsaih a ni bawk a; Micky C. Lalfakzuala leh Victor Lalrohluate’n an endik a, mi 38-in tha takin exam an paltlang a ni.
Colour belt exam thawhhnihna hi district dangah buatsaih a lo ni tawh bawk.