Taiwan-in Elon Musk thusawi chhang let

Taiwan chuan Elon Musk chu an ram ‘China rambung’ a tih hnuah an ram chu ‘hralh tura zawrh a ni lo’ tiin an sawi nghal.
“Taiwan hi PRC (People’s Republic of China) ram bung a ni lo va, hralh atana zawrh a ni lo” tiin foreign minister Joseph Wu chuan a sawi.
Tunkar tir lam khan Musk chuan business summit neihnaah Taiwan chu Hawaii nena khaikhinin China ‘ram bung’ tiin a sawi.
Beijing chuan mahni inrelbawla awm Taiwan chu a ram angah a chhal a, tun hnaiah ram pahnih inlaichinna chu a chhe hle a ni.
Tun karah pawh China chuan Taiwan chhehvelah air leh naval drill neiin Taiwan thliarkar hnaihah hian sipai nunchan zir rengin tun hnai lawkah pawh Chinese military aircraft 40 chuang leh lawng 10 chuang hmangin Taiwan bul hnaiah chet a la a ni.
Tun hi China a sumdawn duh Musk-an Taiwan sorkar a tih thinrim tumkhatna a ni lo va. Nikum October thla pawh khan Beijing leh Taiwan inkar boruak tang siam tha tur chuan China chu Taiwan-ah thuneihna pek mai tur a lo ti tawh bawk a.
Financial Times tena an interview naah sorkar pahnih te chuan inremna pawm theihin an siam thei tiin a sawi a. US a China ambassador chuan Musk thusawi chu lawmawm an tih laiin Taiwan thung chuan an zalenna chu ‘hralh theih a ni lo’ an ti hmak thung.
Wu chuan, “Elon Musk hian CCP te chu an mipuite X an hmantir thei turin nawr se” tiin a sawi zui bawk. A hma pawhin Wu chuan China military drill neih chu January thlaa Taiwan inthlan tur kaihhnawih thil vek tiin a sawi bawk.
“PRC te chuan Taiwan national election-ah inrawlh ngei an tum a. Khua leh tuite thutlukna siam tur a ni a, thenawm mi tihthaih hmangte thuneihna a ni lo,” tiin a sawi.
Musk-a electric car tesla te chuan Shanghai-ah manufacturing plat lian tak neiin May thla khan a tlawh bawk a. Chinese officials te nen inhmuhna neiin Chinese foreign ministry pawhin tesla chuan an ramah sumdawnna tihlena zauh an duh tiin a sawi bawk.