Tamdil humhalh a tulna inhrilh

Tamdil humhalh a tulna inhrilh
Aizawl Forest Division hnuaia awm Saitual Forest Range leh Association for Environmental Preservation (ASEP) tangdun buatsaihin April 2-5 chhung khan Tamdil-in a khuh chin huamchhunga khaw pali – Tualbung, DIlkhan, Sihfa leh Saitual Chawnpui ah Communication & Outreach Programme hman a ni.
He programme hi Tamdil Integrated Management Project chhunga tel niin, tha taka Tamdil humhalh theihna tura programme pakhat a ni. Khawtinah vantlang inkhawm huaihawt a ni a, khawtlang mipui nen Tamdil chungchangah inkawmin, khuanu duansa dil (natural lake) a nih avangin a chhiat mai lohnan theihtawp chhuah a tul tih inzirtir a ni.
Tamdil tlawhtute dimdawi taka enkawltu leh duattu ni theuh turin ASEP hian a sawm a. Thawm ri ring chhuah zawng leh bawlhhlawh hnutchhiahtu ni lo turin a ngen.
ASEP buatsaih vek hian April 4 khan Aizawlah inhmuhkhawm a ko a. Mizoram nungcha – sava, thing leh thlai, rannung tenau zingah Mizo hming nei lo an la awm nual avangin an hming vuah dan tur sawiho a ni.
ASEP president K Lalmuansanga sawi danin, Mizorama awm nungcha, sava leh thilnung chi hrang hrangin Mizo hming an nei lo nual chu a fel lo tiin, Nomenclature Committee din turin sawrkar an ngen tawh a. An ngenna hi hlawhtlingin Committee din a ni tawh a. Tun inrawnkhawmnaa sawite hi pawm turin Committee-ah hian put luh tum a ni.
Mizo hming la nei lote hi a tahtawla zirchian zel nise, an ti a. State Nomenclature Committee chu thutkhawm koh a la nih loh avangin a ranglama thutkhawm ko turin ASEP hian a ngen nghal tih a sawi.