Tang puihnaah nuai hnih kan pe dawn – Lalsawta

Tang puihnaah nuai hnih
kan pe dawn – Lalsawta
An party an sawrkar chuan eizawnnaa mamawhtute tan tanpuina cheng nuai hnih an pe dawn tih Congress president Lalsawta chuan a sawi.
Thawhlehnia Congress Bhavan-a Congress Manifesto No.1 “Tang Puihna” zirhonaah Lalsawta chuan, tang puihnaah hian eizawnna kawng hrang hrangah a mamawhte tan tanpuina cheng nuai hnih an pe dawn tih sawiin, “Chhungkaw mala tanpuina pek bakah kuthnathawktute leh kawng hrang hranga hlawhtlin tuma beitute hnenah sawrkarin an mamawh intawm tur thil a tih sak dawn a, heng mamawh intawm tur thil – kawng siamna, tui lakna, khawl leina leh society-ten an mamawh ang chi ah phei chuan cheng vaibelchhe tel thlengin sawrkarin an mamawhna zawnah tanpuina a pe dawn,” a ti.
An manifesto-a an intiamna leh sem policy nena a danglamna chu, a mamawh leh hlawhtling ngei tura thawktute hnenah chauh he ‘tang puihna’ hi pek tur a ni tih a sawi.
Budget kalphung chu Planning Commission hunlai nen a danglam tawh avangin, sum enkawl thiam phawt chuan, Congress sawrkar lai pawh khan a tulna apianga hman theih turin kum khatah NEDP hnuaiah cheng vaibelchhe 1000 an dah thei tih finance minister hlui Lalsawta hian a sawi a. NITI Ayog hnuaiah chuan state budget ruahmanna fel tak neia enkawl phawt chuan, Mizoram mipui chhanchhuahna tura ruahmanna an siamte chu harsatna awm loin an tihlawhtling thei tih hrechiangtu a ni tih a sawi.
“Sawrkar kal tawhah thlarau MR thahnem tak kan umbo tawh a, thlarau MR umbo avangin kum khatah sawrkarin cheng nuai 4900 kan humhim thei a ni,” a ti.