Tanpuina dawng thei PwD 179

Khawzawl bawrhsap pisa leh Artificial Limbs Manufacturing Corporation of India (ALIMCO) tangdun chuan Khawzawl district-a pianphunga harsatna nei, Persons with Disabilities (PwD) te hman tur, hmanrua an dawn theih nan anmahni endikna – assessment camp chu July 29 atanga August 1 chhung han khaw hrang hrangah an nei a, tanpuina dawngthei hi mi 179 an awm.
Assessment camp-ah hian bawrhsap pisa, ICDS Khawzawl, District Hospital Khawzawl chuan ALIMCO atanga official leh technician lokalte an tawiawm a. Unique Disability Identity card, Aadhar card leh income certificate endikin, tanpuina dawng turte chu chhinchhiah an ni.
Sawrkar laipui Ministry of Social Justice & Empowerment hnuaia ADIP scheme atangin an mamawh ang zelin beng dar, wheel chair, TLM kit, walking stick, adjustable crutch leh Braille kit an dawng thei a; mi 179-te dawn tur hmanrua hi Rs. 14,24,446 man a ni.