Tanzania-ah hacker an chet nasat vangin X khuahkhirh

Tanzania-ah hacker an chet nasat vangin X khuahkhirh
Tanzania-ah mi tibuaitu (hacker)-ten social media platform X-a sorkar leh mi mal thil kaihhnawih account an tihbuai nasat avangin hman khuahkhirh a ni.
Thawhlehni khan police account chu tihbuai niin zahmawh hawl thil leh president a thih thu tar lan a ni.
Police chuan he thil hi la an paih lehnghal a, a titute chhui hna an thawk mek bawk.
He thil thlen hnu lawkah hian internet monitoring organisation Netblocks chuan X chu an rama ‘internet provider lian tak tak atangin khawih theih loh’ a nih thu an puang zui.
An khawpui lian ber, Dar es Salaam-a chengte chuan Nilaini thleng khan phalna nei lova hman theih loh, virtual private network (VPN) hmang chauhvin an khawih thei a, hetih lai hian region dang thenkhatah chuan hmang thei an la awm.
Thuneitute chuan X hi hman theih loh turin an dangchat nge tih an la puang lo.
Information Minister Jerry Silaa hack hi an hriat tawh thu leh parliament-ah MP-te hnenah sorkar social media account-te chu him tawk tura an tih tawh thu a sawi.
A hmain sorkar thupuangtu, Gerson Msigwa chuan a titute lakah na taka chet ve a nih tur thu a sawi tawh.
X hman hleih theih lohva a awm mek lai hian Kenyan mi langsar tak takte an rama thawn haw chungchangah inhnialna a tam hle a. Hetianga tih a nih hian eptu hruaitu, ram phatsana puh, Tundu Lissu-a tana court-a an inlan theih lohna tur nia sawi a ni.
Thawhtanni khan president chuan hmar lama an thenawm mite chu an ram chhung thilah ‘inrawlh’ an phal dawn loh thu leh hei hian buaina mai a thlen niin a sawi.
Kenya-a justice minister hlui, Martha Karua-i leh mi dang, Lissu-a thubuaia ding turte chu an thawn haw vek a ni.
Thawhtanni khan Kenyan activist, Boniface Mwangi leh Ugandan Agather Atuhaire te pawh Dar es Salaam-ah sipai officer-ten an man nia sawi a ni a, khawiah nge an awm hriat a ni tawh rih lo va, Tanzanian thuneituten engmah an la sawi lo.
Tanziania-a dan hre mite awmna pawl, Tanganyika Law Society-a president, Boniface Mwabukusi chuan Nilaini khan mi pahnihte hi immigration department-in an man tih an hriat thu leh thawn haw leh tawh an ni tih a sawi.