US khawpuiah Israel embassy-a thawk pahnih kap hlum

US khawpuiah Israel embassy-a thawk pahnih kap hlum
United States-a Israel embassy-a thawktu mi pahnih chu khawpuia Jewish museum pawnah kah hlum an ni.
Inkahna hi Nilaini zan dar 09:00 hnu lama Capital Jewish Museum, Washington, DC-a thleng niin thuneituten an sawi.
Metropolitan Police Department chief Pamela A. Smith chuan he thilah hian mipa pakhat rinhlelh thilah man a ni tih a sawi a, amah hi kum 30 mi, Elias Rodriguez, Chicago, Illinois niin a sawi.
Smith chuan Rodriguez-a hi, “Free, free, Palestine,” tiin an tantirna hmunah pawh a la au niin a sawi.
US Secretary of Homeland Security Kristi Noem chuan he thil thleng hi sorkar laipuia thuneituten an chhui zui mek tih a sawi.
“A tuartu chhungte kan tawngtaipui a. A titu lakah hian dikna hlenchhuah ngei a ni ang,” tiin Noem chuan a sawi.
Museum-a pun khawmna huaihawttu, American Jewish Committee chuan an thiltihna pawna tharum thawhna rawng tak thleng chu ‘sawi mai aia na leh hrehawm’ a nih thu an sawi.
“Tunah hian police atangin eng ang chiah nge thleng leh thil kan dan kan ngaichang mek a a tihbuai chhungkua leh tuartute kan ngaihtuahin kan tawrhpui tak zet a ni,” tiin an pawl chuan thu an chhuah.
US Attorney General Pamela Bondi chuan inkahna thlenna hmunah hian a awm thu sawiin ‘tharum thawhna thleng tuartute tan kan tawngtai a, thil awm dan kan ngaichang mek zel’ tih a sawi.
United Nations-a Israel palai, Danny Danon chuan he thil hi Juda-te huatnain a hrin chhuah a nih thu a sawi a. “Judate tihnat tumna hian tiam chin a pel hial tawh a ni,” a ti.
“US thuneitute hian he thil rapthlak tak titute lakah hian dik takin thil a kalpui ang tih kan ring tlat a. Israel hi a khua leh tui leh a aiawhte himna atan khawvel pumah a thawk zel bawk ang,” a ti.