Tanzania president JNU-in chawimawi
Tanzanian President Samia Suluhu Hassan chu Jawaharlal Nehru University (JNU) in honorary doctorate degree pein hmeichhe zinga he chawimawina dawng thei hmasa ber a ni.
October 8 khan President Hassan hian India lutin ni li a cham dawn a.
India-Tanzania inlaichinna tha zawka siam a nihna lama a thawhthat em avangin leh economic diplomacy kalpuia regional integration leh multilateralism lama hlawhtlinna a neih avanga pek a ni.
Hassan hi hmeichhia Tanzania President ni thei hmasa ber a ni a, African thingtlang khuaa chhungkaw rethei tak atangin an ram president ni hial thei a ni.
“India ngainat hi a awl em em a. Indian hla a ni emaw, Indian movie a ni emaw, India cuisine a ni emaw, Indian charm hnar hi a har a ni. Chu chu kum 1998-a Hyderabad a lehkha zira India ka lo pan khan ka hria a ni,” tiin a sawi.
“Jawaharlal Nehru University family member angin ka ding a, tunah chuan visiting guest ka ni tawh lo. Chu tak chu India hnial a har em em na a ni. Hei tak hi India incredible India a nihna a ni,” tiin a sawi.
Hassan chuan colonialism avanga harsatna an tawhah India chu innghahna tlak a nih tlat thu a sawi bawk a. “Colonialism kaihhnawiha harsatna kan neihah India chu innghahna tlak a ni a,” tia sawiin, “He university orpui takin duhsakna min lantir hi ka lawm em em a ni,” tiin a sawi bawk.
He event-ah hian Union Minister for Education and Skill Development and Entrepreneurship Dharmendra Pradhan leh Minister of External Affairs S Jaishankar te an tel a. “Ram pahnih tena economic lama inzawmna an neih chu chakna hnan a ni a. Tanzania nena kan insumdawntawnna hi kum za tam tak kalta atang khan intan a ni tawh. Covid-19 avanga khawvelin harsatna a tawh lai pawhin ram pahnih insumdawntawnna chu a tha em em reng a ni,” tiin Jaishankar chuan a sawi.
Education Minister Pradhan pawhin India chu Global South tihlen tumna kal zelah African partner ber a ni a ti a, a bik takin education leh human resource development lamah a ni zual a ni tiin a sawi.
Tanzanian president hian National Institute of Rural Development and Panchayati Raj, Hyderabad hnuaia Indian Technical and Economic Cooperation (ITEC) programme hnuaiah training a nei a ni. ITEC hi capacity-building programme Ministry of External Affairs-in an kalpui a ni.