‘Tar pension’ la 25213 an awm

‘Tar pension’ la 25213 an awm
Sawrkar ruahmannaa kum upate hnena sumfaia chhawmdawlna pek thin, ‘tar pension’ tia sawi mai chu Mizoramah latu 25213 an awm mek a. Hmeithai pension latu 2310 awmin, rualbanlo pension la 742 an awm.
Old age pension leh a kaihhnawih pension khaikhawmtu National Social Assistance Programme (NSAP) chungchanga nodal department – Social Welfare-a officer leh hemi khawihtu bik thawktute Nilaini khan Aizawlah kohkhawm niin an hriat tur tul hrilh an ni.
NSAP hnuaia scheme pali – Indira Gandhi National Old Age Pension Scheme (IGNOAPS), Indira Gandhi National Widow Pension Scheme (IGNWPS), Indira Gandhi National Disability Pension Scheme (IGNDPS) leh National Family Benefit Scheme (NFBS) a chhawmdawlna dawngtuten an bank/ postal account-ah direct benefit transfer kaltlanga tanpuina an dawn theihna’na hmalakna a ni.
NSAP hnuaia chhawmdawlna dawng thei tur hian India khua leh tui tupawh sawrkarin below poverty line (BPL) chhungkua an ni ngei tih a hriatpui nih a ngai a. NSAP hnuaia pension hi sawrkar laipui hmalakna bakah Mizoram sawrkar hmalakna tangdun chhawm dawlna pek a ni a; Mizoram sawrkarin kum 2024-2025 atangin a hmaa chhawmdawlna Rs.100 pek thin chu Rs. 1000 ah a tisang bawk.
Mizoram sawrkarin chhawmdawlna a pek bik Rs. 1000 hi pension dawngtute hnenah kum 2024- 2025 atan hian April atanga September thleng semchhuah a ni tawh.
NSAP-PPS on-boarding programme hi Social Welfare minister Lalrinpuii’n a hmanpui a. District hrang hranga Social Welfare officer leh staff-te bakah Social Welfare & Tribal Affairs directorate hnuaia NSAP kaihhnawih changtu staff-te hnenah Ministry of Rural Development atanga resource person lokalten training an pe a, mi 25 an tel. Sawrkar kum kal mek atangin chhawmdawlna dawngtuten anmahni account (DBT) ah a hun taka chhawmdawlna an dawn theih nan chak taka hma lak nghal tum a ni tih an sawi.

* NSAP hi Mizoram sawrkarah Social Welfare & Tribal Affairs chu nodal department niin, sawrkar laipuia kutkentu Ministry of Rural Development hmalakna pawimawh leh thleng thui ber zing ami a ni mek.
* 1995 August 15-a sawrkar laipuiin NSAP a din atangin Mizoramah pawh kalpui a ni a. IGNOAPS hnuaiah chhawmdawlna dawng 25213, IGNWPS dawng 2310 leh IGNDP dawng 742 an awm. Chhungkaw chawmtu ber boral ta chhungte hnena pek – NFBS ah chhungkua 197 hnenah pek a ni bawk.
* IGNOAPS hnuaiah BPL chhungkua, kum lama upa hnenah pension pek a ni a. Kum 60-79 inkar hnenah thlatin Rs.200 (central) leh Rs.1000 (state), a vaiin Rs. 1200 pek a ni a. Kum 80 chunglam hnenah Rs.500 (central) leh Rs.1000 (state), a vaiin Rs. 1500 pek a ni.
* IGNWPS hnuaiah hmeithai (BPL chhungkua) kum 40-79 inkar hnenah Rs.300 (central) leh Rs.1000 (state), a vaiin Rs. 1300 thla tin pek a ni a. Kum 80 chunglam hnenah Rs.500 (central) leh Rs.1000 (state), a vaiin Rs. 1500 pek a ni.
* IGNDPS hnuaiah rualbanlo (BPL chhungkua) kum 18-79 inkar hnenah Rs.300 (central) leh Rs.1000 (state), a vaiin Rs.1300 thlatin pek a ni a. Kum 80 chunglam hnenah Rs.500 (central) leh Rs.1000 (state), a vaiin Rs.1500 pek a ni.
* NFBS hnuaiah chhungkaw eizawngtu ber a boralin, BPL chhungkua hnenah vawikhat atan tanpuina Rs. 20000 pek thin a ni a. Chhawmdawlna hi chenpui la damte hnenah, khawtlang hruaitute nen tangtlangin chhungkaw lu ber leh eizawngtu ber a ni tih hriatpui hnuah pek a ni. Eizawngtu ber chu hmeichhia emaw mipa emaw pawh nise, kum 18 leh kum 60 inkar a nih laia thi a nih chuan a pek theih