Hachhek biala kuhva chingtuten an inchhut lawk aia cheng nuai 2000 chuanga hniam kuhva rah an hralh thei chauh a, dan loa kuhva rah tawlhruk nghawng niin an sawi.
Hachhek Bial Kuhva Chingtu Pawl (HBKCP) zirchiannaah kum 2021 ah an kuhva rah hralhna atangin cheng nuai 3235 chuang an hmu a; kum 2022 ah nuai 5000 chuang hmuhchhuah an inbeisei laiin, nuai 2000 chuang an hloh zawk thung.
Kuminah kuhva hralh kawnga harsatna an tawh nawn tawh lohna’n theihtawpa hma lak an tum tih HBKCP hian sawiin, chu hmalakna kal zelah chuan July 12 zing dar 9.00 atang khan chhunzan zawmin Zamuang Police Check Post-a duty te tha ti chak turin anmahni atangin duty an indah ve tawh dawn tih an sawi.
HBKCP thuchhuak chuan, Hachhek bial khaw hrang hrang atangin darkar 24 zel a inchhawkin an duty dawn a. An duty chhungin khawi atang mahin dan phal loh kuhva, Hachhek bial chhunga tawlh lut lo turin kuhva tawlha inhnamhnawih zawng zawng, lirthei neitu leh khalhtu zawng zawng an ngen tih an sawi.
Zamuanga Police Check Post hi HBKCP-in thuneitute a ngen avanga siam a nih thu leh Hachhek bial chhung Police Station leh Outpost bakah IR leh MAP lam duty tura fawmkhawm thin a nih thu te sawiin, Hachhek bial chhunga police leh armed force awmte khawi station ah mah an sanctioned strength an phak loh avangin sawrkar lamah pawh ngenna an siam tawh tih an sawi a ni.
Tawlhruk hluar hnuah kuhva rah hralh tlahniam
Get real time updates directly on you device, subscribe now.