Tawng chi thum zir tharin matric a pass

Kar hmasaa HSLC result chhuakah khan zirlai pakhat, first division-a pass chuan tawng chi thum a zir chawp; zirna avangin Mizo, English leh Hindi te a zir chawp.
He zirlai hi raltlan a ni a, Chunghnempari niin, Myanmar-a Khuanglung khua, Khawbung, Champhai district-a raltlan a ni.
Khawbungah hian pawl 6 atangin a zir a, Hindi hi a zir ngai lo mai a ni lo, Hindi hawrawp a la hmu ngai lo. Mizorama sikul a kalin Hindi subject a awm si a, a zir chawp a ngai. English a zir thin a, mahse a thiam lo. Myanmar-ah hian kawl (Burmese) tawngin lehkha an zir a, English chu subject pakhat ni mah se an zir nasa lo. Chuvangin a thiam lo khawp mai, a sawi danin.
Myanmar-ah kawl tawnga an zir avangin Mizo tawng a chhiar thiam lo a, a ziak thiam hek lo. Mizo subject an zir ngai lo. Chu chu pawl 6 a nihin a zir that leh a ngai a, A AW B atangin a zir. Subject pathum a zir thar tihna ang deuh a ni.
Hnemtei tia koh Chunghnempari hian theihtawp chhuahin lehkha a zir a, matric chu first division-ah a pass. A ziah leh a chhiar a zir chawpna Mizo subject-ah phei chuan letter a hmu.
“A mak ka ti lutuk. Ka pass hi ka inring lo reng reng a, first division phei chu ka beisei pha lo. Ka fail ka ring a, mahse first division-ah ka pass a, ka hriat tirhah phei chuan ka awih lo a,” Hnemtei chuan a ti.
Rilru chak lo, thiam thei lo a inti a, exam laiin a dam lo bawk. Chuvangin beisei a nei sang lo.
“Lehkha hi ka zir char char… ka rilru a chak lo lutuk a, kei chu zir char char ka ngai, Inrinni-ah pawh ka zir,” a ti.
Sikul banah eirawng a bawl thin a, zingah a bawl thin bawk. Mahse eirawngbawl chung pawhin lehkha hi a zir thin tih a sawi. Zanah a thiam thei lo a, chuvangin zing leh tlaiah rawngbawl pah pawha zir a tum thin tih a sawi. Zan lamah pawh thiam thei lo a inti na a, a zir ziah tho a, Inrinni chhunah te pawh a zir thin tih a sawi bawk.
Phone a nei a, “Phone chu ka nei a, mahse ka khawih nasa lo. Zanah lehkha zir chawlh laia phone ka lo khawih hian ka nuin ‘Zir rawh,’ min lo ti thin,” a ti. “Lehkhazir hi ka ning lo a, zir zel ka duh,” a ti bawk.
“Kan zirtirtute an fel a, thahnem an ngai a, min zirtir tha,” a ti a, “Sikulah tu man min en hrang lo a, Khawbung mipui pawhin min en hrang lo. Khawbung hi nuam kan ti lutuk,” a ti bawk.