Taxi service leh taxi fare

Mizoram Taxi Association (MTA) hruaitute chuan nimin khan thuthar thehdarhtute kawmin taxi service chungchang an sawifiah a.
Taxi hi hlawm hnihin an kal a, MTA la zawm lo taxi 200 vel an awm a, taxi stand 80-in MTA an zawm tawh laiin stand 3 chuan MTA an la zawm lo. Taxi-a thil theihnghilh chungchangah, stand-a ding ngei hman a him; kawnglaka tlan lai taxi hman dawn pawhin MTA sticker bel ngei hman a him zawk bawk. A chhan chu taxi-a thil theihnghilh pawhin zawn chhuah a awl bik. Taxi hmangtuten taxi nambar chhinchhiah Thin se, an ti bawk.
India ram hmun dang emaw, khawvel ram hrang hrangah pawh ni se, Mizorama taxi pawl MTA ten passenger-te himna tur an ngaihtuah anga ngaihtuah hi taxi service dang hi an awm ve ang em tih hi ngaihtuah tham tak a ni.
Kum 15 vel kaltaah khan, state pawn aTanga lo zin, hnamdang ten taxi-ah camera an theihnghilh a, hmuh let leh an inring tawh lo; mahse, taxi driver zawkin a passenger ten an thil theihnghilh an hmuh let leh theih nan taxi driver association office-ah camera chu a dah a. A passenger-te chuan Aizawla an hmelhriat Mizote an pun a, ZTDA office lam an zawt a, camera chu an hmu leh ta a. “Mizoramah thil a bo ve thei lo ang” an ti thlawt mai a ni awm e. Mizoram taxi service te an chhuanawm hle a ni.
Hetih lai hian, taxi fare mumal lo ta lutuk pawh hi chinfel a hun tawh hlein a lang. STA-in taxi fare a bituk hnuhnung ber kha 2011 a ni a, notifed taxi stand pawh 45 chauh a la awm a, tunah 80 a awm tawh a, kum 10 lai a lo liam tawh bawk nen, taxi service tin hian sawrkar ‘approved taxi fare book’ hi an passenger-te nena an keu ho theih tura an kawl vek hi a pawimawh hle.
Sawrkarin taxi rate a bithliah (2011) dan kha chuan, stand chhuahsan aTanga 1km thleng chuanman Rs 40, a bak zawng km 1 zelah Rs 30, tih a ni a. Mizoram Motor Vehicle Rules, 1996, rule 26(g)-in a siam angin Stand aTanga route hnai ber zel distance lak a ni Thin. Driver kal duh lo an awm chuan police/enforcement hnai berah report Thin tur, tih dante kha a awm a. A lo rei ta deuh nge, dan hi kan zawm Tha lo ta deuh niin a lang.
Thil dangah kan taxi te service a smart em em a, fare berah a smart leh si loh chuan mipui harsatna thlentu a ni thei a, hei hi sawrkar hian a ngaihtuah ran a Tha awm asin.