Taylor Swift ‘1989 (Taylor’s Version)’ a la No.1 Jung Kook leh Jimmy Buffett top 10 an debut

Taylor Swift re-re
corded album
‘1989 (Taylor’s Version)’ chu Billboard 200 (albums) chart-ah a No.1 a, he chart-a kar hnih a No.1-na a ni ta. Hetihrual hian BTS member Jung Kook album thar ‘Golden’ pawh No.2-ah a debut a, Jimmy Buffett album thar ‘Equal Strain on All Parts’ chu No.6-ah a debut bawk.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna (traditional album sales) bakah streaming atanga album hralhna tlukpui (streaming equivalent albums) leh album-a hla mal hralhna atanga album tlukpui (track equivalent albums) te belhkhawm thin a ni.
‘1989 (Taylor’s Version)’ hi a kar khatnaah maktaduai 1.653 an hralh thei kha a ni a, a kar hnihnaah pawh 2,45,000 an la hralh thei a, chung zinga 1,22,000 chu album tak tak hralhna niin, streaming atangin 1,21,500 (on-demand official stream maktaduai 159.54) a tling a, album-a hla mal hralhna atangin 1,500 a tling thei bawk. Taylor Swift hian deluxe digital download edition a tlangzarh thar bawk a, hei hi chu ama official webstore atangin ni khat chauh lei theihin an dah ve thung. He album version tharah hian bonus track ‘Slut! (Acoustic Version) (Taylor’s Version)’ a dah tel bawk.
Jung Kook solo album hmasa ber ‘Golden’ chu 2,10,200 hralhin No.2-ah a debut a, 1,64,800 chu album tak tak hralhna niin, streaming atangin 29,800 (on-demand official stream maktaduai 41.59) a tling a, hla mal hralhna atangin 15,600 a tling thei bawk. ‘Golden’ album hi CD an hralh tam ber a, 1,28,500 a tling a, digital download album chu 36,300 a ni bawk. ‘Golden’ album-ah hian Billboard Hot 100 (singles) chart-a top 10 kai thei hla pahnih a dah tel a. No.1 kai thei ‘Seven’ featuring Latto leh No.5 kai thei ‘3D’ featuring Jack Harlow te a dah tel.
‘Golden’ hi Jung Kook solo album Billboard 200 chart-a a lan vawi khatna a ni a, BTS member pasarih zinga he chart-a top 10 kai thei album nei thei parukna niin, BTS ang hian Top 10 album pasarih nei tawhin, chung zingah paruk chu No.1 an kai nghe nghe a ni.
Billboard Hot 100 chart top 2 te hi he chart-a No.1 lo ni tawh album pathumin an dawt a. Drake ‘For All the Dogs’ chu 81,000 hralh lehin No.3-ah bawk a la awm a, Morgan Wallen ‘One Thing at a Time’ chu 65,000 hralh lehin No.5 atangin No.4-ah a insawn leh gret a, Bad Bunnt ‘Nadie Sabe Lo Que Va a Pasar Manana’ chu 60,000 hralh lehin No.4 atangin No.5-ah a tawlh ve thung.
A thih hnua an tlangzarh, Jimmy Buffett albumm, a studio album hnuhnung ber tur ni tawh ‘Equal Strain on All Parts’ chu 53,000 aia tam deuhin hralhin No.6-ah a debut. Buffett hi kum 76 mi niin, September ni 1 khan vun cancer avangin a thi. Tuna a album thar hi hla 14 awmna niin, he chart top 10-a lang thei album 14 a neihna a ni a, he album-ah hian Emmylou Harris, Angelique Kidjo, Lennie Gallant, Will Kimbrough, Preservation Hall Jazz Band leh Paul McCartney a thawhpuina hla te a dah.
Chart No.1 hlui Rod Wave album ‘Nostalgia’ chu 45,000 hralh lehin No.6 tangin No.7-ah a tawlh a, Zach Bryan album ‘Zach Bryan’ chu 45,000 tling lo deuh hralhin No.9 atangin No.8-ah a insawn a, chart No.1 hlui Taylor Swift ‘Midnights’ chu 43,000 hralh lehin No.7 atangin No.9-ah a tawlh a, SZA ‘SOS’ chu 42,000 hralh lehin No.10-ah bawk a la awm.