Taylor Swift ‘1989 (Taylor’s Version)’-in Spotify record a siam

Tunlai chu Taylor Swift chetvelna a nih tawh chuan record a siam thei deuh zel mai, nikum khan a album ‘Midnights’ chuan Spotify-a ni khat thil thua album stream nasat ber record a siam a, tunah a album hlui a record that leh ‘1989 (Taylor’s Version)’ chuan hetiang record hi a rawn siam thar leh ta a ni.
Taylor Swift album thar ‘1989 (Taylor’s Version)’ hi October ni 27, Zirtawpni khan tlangzarh a ni a, hemi niah hian Taylor Swift hian record dang pawh a siam a, Spotify-a zaithiam ni khat thil thua stream nasat ber a ni bawk.
‘1989 (Taylor’s Version)’-ah hian a original album-a hla 13 te chu record thar lehin a telh leh vek a, hei bakah hian bonus track pathum (“Wonderland,” “New Romantics” leh “You Are In Love”) leh a hla record tawh sa, a la tihchhuah lo hla panga (“Is It Over Now?,” “Now That We Don’t Talk,” “Say Don’t Go,” “Suburban Legends” leh “Slut!”) te a dah tel bawk.
Taylor Swift hian ‘Taylor’s Version’ re-recorded album tihchhuah tur dang pahnih a la nei a, ‘Fearless (Taylor’s Version)’ leh ‘Red (Taylor’s Version)’ te 2021-ah a tichhuak tawh a, ‘Speak Now (Taylor’s Version)’ chu kumin kumtir lam khan a tichhuak tawh bawk a, tunah a la bang chu 2006-a a self-titled album ‘Taylor Swift’ leh 2017-a a album ‘Reputation’ te kha an ni. Swift hian Big Machine Records hnuaia a awm laia a album zawng zawng chu record thar lehin tlangzarh that leh vek a tum a ni.
‘1989 (Taylor’s Version)’ hi hralh pawh a kal hle a, an tlangzarh atanga darkar 24 chhungin US-ah copy 2,50,000 chuang an hralh hman a, nikhat chauh an zuar chhuak hman tihah kumina album tlangzarh thar zinga kar khat chhunga hralh tam theih lamah pathumna a ni pha nghal der mai a, Swift album dang kar khata 5,07,000 hralh theih ‘Speak Now (Taylor’s Version)’ leh 2,52,000 hralh theih Travis Scott ‘Utopia’ te chiah a pha lo.