Taylor Swift album release party leh music video cinema hall-ah

Taylor Swift album thar, a studio album 12-na ‘The Life of a Sowgirl’ chu special film project ‘The Official Release Party of a Showgirl’-in a zui nghal zat dawn a, hei hi album tlangzarh rualin cinema hall-ah an tichhuak nghal dawn a ni. Album hi October ni 3-a tlangzarh tur niin, film pawh October ni 3 zan atangin cinema hall-ah a chhuak tan nghal ang.
He movie-ah hian album-a hla ‘The Fate of Ophelia’ music video dah a ni a, he music video tihchhuah hmasak nan cinema hall hi an hmang nghal dawn a, hei bakah hian behind-the-scene footage hrang hrang te a awm dawn bawk a, a film hi minute 89 a sei a ni a, Swift chuan fan-te chu film en tura sawmin, “Lâm leh lâm loh chu mahni thu thu a nia mahse lâm ve ngei chu a ngai ang,” a ti.
Taylor Swift hi film lamah a mikhual tawh bik lo a, Netflix ‘Miss Americana’ documentary 2020-a tihchhuahah a chang tawh a, 2023-ah ‘Eras Tour’ concert film a tlangzarh tawh bawk a, he film phei hi chuan US-ah cinema hall ticket hralhna atanga dollar maktaduai 179.2 la lutin, concert film tlangzarh tawh zawng zawng sum la lut tam ber a la ni.
Swift hian ama screen project-te pawh a lo direct nual tawh a, chung zingah chuan 2021-a tihchhuah ‘All Too Well: The Short Film’ pawh kha a tel a, tunah hian Searchlight Pictures hnuaiah original film siam turin an indawr mek niin report a awm a, he film siam tur hi a script pawh ama ziah niin, a direct nghal dawn niin report a awm.