Taylor Swift ‘Cruel Summer’ a la Hot ber
Taylor Swift ‘Cruel Summer’ a la Hot ber
Taylor Swift hla hit ‘Cruel Summer’ chu kar khat chhunga US-a hla lar ber niin, Billboard Hot 100 (singles) chart-ah a No.1, hetihrual hian Jack Harlow leh Tate McRae te pawh top 10-ah an lang.
Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni.
Taylor Swift ‘Cruel Summer’ hian stream maktaduai 14.4 leh download sales 3,000 bakah radio airplay-ah ngaithlatu maktaduai 73.9 a la nei thei a, hei hi a kar li nan chart-ah a No.1 pui leh ta a, tihian he chart-a a No.1 tawh zawng zawng belhkhawm chu kar 34 a tling ta a, Hot 100 chart-a No.1 nih ngun ah Adele, Elton John leh Bruno Mars te nihrualin, pakuana an ni. He chart-a No.1 kai thei hla ngah ber chu Mariah Carey (91) niin, Rihanna (60), The Beatles (59), Drake (56), Boyz II Men (50), Usher (47), Beyonce (43) leh Michael Jackson (37) ten an dawt.
Issue hmasa lama tarlan tawh angin Cruel Summer hi Swift album, 2019-a a tlangzarh ‘Lover’ atanga a single a ni a, The Eras Tour a neih mekah a rawn sa lar thar leh ta a ni.
Jack Harlow “Lovin on Me”-in stream maktaduai 22.2 leh sales 12,000 neiin, radio airplay-ah maktaduai 12.2 a tling bawk a, hei hi chart-ah a No.2 pui ta a, he chart-a top 5 kai thei hla panga a neihna a ni.
Chart No.1 hlui Doja Cat ‘Paint the Town Red’ chu No.2 atangin No.3-ah a tawlh a, SZA ‘Snooze’ chu No.4-ah bawk la awmin, chart No.1 hlui Taylor Swift ‘Is It Over Now? (Taylor’s Version) [From the Vault]’ chu No.3 atangin No.5-ah a tawlh a, chart No.1 hlui bawk Zach Bryan ‘I Remember Everything’ featuring Kacey Musgraves chu No.6-ah bawk a la awm.
Tate McRae ‘Greedy’ chu stream maktaduai 13 leh sales 2,000 bakah radio airplay maktaduai 39.1 tlingin, No.11 atangin No.8 a kai a, he chart top 10-a a lan vawi khatna a ni. ‘Greedy’ hi a album pahnihna, December ni 8-a a tlangzarh tur ‘Think Later’ atanga a single a ni a, niminpiah a sem tak 2023 Billboard Music Awards-ah pawh a sa nghe nghe a ni.
Chart No.1 hlui Morgan Wallen ‘Last Night’ chu No.10 atangin No.9 a kai thar leh a, a hla dang ‘Thinkin’ Bout Me’ chu No.9 atangin No.10-ah a tawlh ve thung.