Billboard-in an chhut danin Taylor Swift ‘Eras Tour’ chuan khawvel huapin dollar maktaduai 900 chuang a lalut thei dawn a, tuna tum khat tour atanga sum lalut tam record siamtu Elton John ‘Farewell Yellow Brick Road Tour’ record a khum thei dawn niin an chhut. Hetihrual hian Swift tour sum che vel hi official-in report an la dawng lo niin Billboard chuan an tarlang bawk.
Taylor Swift hian November ni 26 khan kumin atana a tour kharna neiin, Eras Tour-ah hian show vawi 66 nei hmanin, USA, Mexico leh South America a tlawh hman a, Eras Tour hi kum tharah a chhunzawm leh dawn a ni. Tuna an chhut dan chuan vawi khat show a neihah hian ticket hralhna atangin dollar maktaduai 14 vel zel hmuchhuak ang a ni.
Taylor Swift hian The eras Tour hi March ni 17 khan Glendale, Arizona-ah bul tanin, US state hrang hrangah show vawi 53 neiin, Inglewood, California-a SoFi Stadium-ah a US tour hi a khar a, US-ah hian khawpui 20-ah show a nei hman a, US-a concert vawi 53 a neihah hian ticket maktaduai 3.3 vel a hralh thei niin an chhut a, chawhrualin show vawi khatah ticket 63,000 vel zel hralh ang a ni. US-ah hian concert ticket hi chawhrualin pakhat dollar 252 man ang vel a ni a, US bika a tour-ah ringawt pawh dollar maktaduai 838.3 vel hmuchhuak thei angin an chhut a ni.
North America-a tum khat tour-a dollar maktaduai 838 hmuh theih hi pui tham tak mai a ni a, hei hian Eras Tour hi US leh North America-a tum khat tour atanga sum lalut tam berah a vawrh kai dawn ta a ni. Tuna record siamtu Elton John ‘Farewell Yellow Brick Road’ tour hian North America-ah dollar maktaduai 567.7 a lalut thei a, he tour hi kum li chhung neiin, show vawi 235 a nei hman a, Swift hi chuan thla ruk chhungin, show vawi 53 chauh neiin, hetiang record hi a rawn siam thei dawn a ni.
Tunah hian khawvel huapa tum khat tour a sum lalut hnem ber chu Elyton John niin, ani hian US bakah ram hrang hrangah ‘Farewell’ tour a neihna atangin dollar maktaduai 939.1 a lalut thei a, he record pawh hi Swift ‘Eras Tour’ hian a khum thei ngei dawn tih a chiang tawh a, tunah pawh America khawmualpui a la chhuahsan lo nain, Swift hian khawvel huapa tour atanga sum lalut tam ber dawttu chu a ni pha der tawh a ni.
Taylor Swift hian ‘Eras Tour’ hi nakkum February ni 7 atangin a tan leh dawn a, Tokyo Dome, Japan-ah show vawi li neiin bul a tan ang a, Australia-ah show vawi sarih neiin, Sigapore-ah vawi ruk a nei bawk ang. Tichuan May thlaah Europe fangin, ram hrang hrangah show vawi 50 a nei ang a, chumi hnuah North America-ah let lehin show vawi 18 a nei leh ang a, nakkum-ah hian show vawi 85 a nei leh dawn a, heng show atanga a sum hmuh leh tur te nena chhut chuan The Eras Tour atanga a sum hmuh zawng zawng hi dollar tluklehdingawn 1.6 atanga 1.7 vel a tling dawn niin an chhut
Taylor Swift ‘Eras Tour’-in record siam thei dawn
Get real time updates directly on you device, subscribe now.