Taylor Swift hausaknain $2B a kai ta

Sum leh pai lama Taylor Swift, kum 36, hlutna chu dollar tluklehdingawn hnih (dollar 2 billion) a kai ta a, 2024 khan a hausakna hi dollar tlukledingawn 1.6 niin, Forbes-in a tarlan danin kum khat leh a chanve chhunga dollar maktaduai 600 velin a lo hausak belh leh hman tawh tihna a nih chu! Swift hian khawvela hmeichhe musician zinga hausa ber a nihna a sawhnghet leh ta sauh a ni.
Forbes magazine hian “Iconoclast 50” list chu June ni 3 khan an tichhuak a, 2023-a billionaire rawn ni tan, Taylor Swift chu a billionaire tan atanga kum thum chhungin a hausakna a letin a pung hman a ni. Swift hian Eras Tour ticket hralh that zar zoin billionaire a rawn kai a, he tour hi 2023-2025 thleng neiin, hetih chhung hian a album hlui a record tharleh te pawh a tichhuak nual hman a, a album te a hralh tha em em vek bawk.
2024-ah album thar The Tortured Poets Department leh 2025-ah The Life of a Showgirl a tlangzarh bawk a, heng album pahnih te hian record an rawn siam deuh mawlh mawlh a, hei bakah hian nikum khan a album hmasalam paruk te chu a neitu nihna a lei let ve vek tawh bawk.
Taylor Swift hi sumdawnna dang tel lo, rimawi leh a kaihhnawih ringawt atanga billionaire ni thei hmasa ber a ni a, a sum hmuhna lian chu royalty leh touring niin, heta tang ringawt pawh hian dollar maktaduai 800 a hmuchhuak thei a, a music catalog hlutna hi dollar maktaduai 600 angin an chhut a, a real estate hlut pawh dollar maktaduai 110 angin Forbes chuan an chhut bawk.
Taylor Swift hlutna hian October 2024 khan dollar tluklehdingawn 1.6 kaiin, Rihanna lehpelin hmeichhe musician zinga hausa ber a rawn ni a, vawiin thlengin he title hi a la hum nghet ta zel a ni. Musician zinga hausa ber erawh Jay-Z niin, a hausakna hi dollar tluklehdingawn 2.8 angin an chhut. Hetihrual hian Jay-Z te hi chuan music bakah sumdawnna lian dang an nei tel nual a ni.
Taylor Swift sawi takah chuan a hla thar “I Knew It, I Knew You,” pawh a tichhuak ve leh ta a, he hla hi Jack Antonoff nen Toy Story 5 soundtrack atana an phuah dun niin, Swift hian rimawi zin kawnga a bul tanna country music a rawn hrut leh ta a ni. Animated film Toy Story 5-ah hian Woody (Tom Hanks), Jessie (Joan Cusack) leh Buzz Lightyear (Tim Allen) te inlan lehin, misual thar Lilypad (Greta Lee) a rawn tel ta bawk. A film hi June ni 19 atangin cinema hall-ah an tichhuak tan ang.