Taylor Swift-i’n a Artist 100 chart record a sawhnghet

Taylor Swift-i’n a Artist 100 chart record a sawhnghet
Taylor Swift chu kar khat chhunga US-a zaithiam lar ber niin, Billboard Artist 100 chart-ah a No.1 a, he chart-a a No.1 tawh zawng zawng chu kar 68 a tling ta a, he chart-a No.1 ni ngun ber a nihna chu a sawh nghet leh ta sauh e. Hetihrual hian Lil Durk pawh top 10-ah a rawn lang ve leh ta bawk.
Billboard Artist 100 chart hi kar kar khat chhunga US-a zaithiam lar dan tehna niin, chart ranking siam nan hian hian album leh hla hralh tam dan te, streaming leh radio airplay te chu tehna pawimawh a ni.
Taylor Swift hian a album hralh That zar a zo a, a album thar ber ‘Midnights’ chu kar khat chhunga 2,82,000 hralh lehin a kar ruk nan Billboard 200 (albums) chart-ah a No.1 leh a, he album hi nikum November-a a tlangzarh daih tawh kha niin, a kar khatnaah maktaduai 1.578 hralhin No.1 te pawh a lo ni zak zak tawh a ni. He album hi May ni 26 khan a deluxe edition ‘Til Dawn Edition’ an tih, hla 23 awmna chu a tlangzarh nawn leh a, he album tharah hian a original track 13 bakah bonus hla pasarih leh bonus tune pathum a dah thar a. hemi ni vekah hian The Late Night Edition an tlangzarh nghal bawk a, hla 21 awmna niin, a original track 13 bakah bonus track panga leh hla thar pathum a dah tel bawk a ni.
Swift album pakua chu Billboard 200 chart-ah hian a lang a- Midnights (No. 1), Lover (No. 6), 1989 (No. 11), Folklore (No. 13), Reputation (No. 18), Red (Taylor’s Version) (No. 20), Evermore (No. 35), Fearless (Taylor’s Version) (No. 39) leh Speak Now (No. 45) te niin, a hla panga chu Billboard Hot 100 (singles) chart-ah langin, ‘Karma’ featuring Ice Spice chu No.2 a kai a, Anti-Hero pawh No.11 niin, ‘Hits Different’ chu No.27 a ni a, ‘Snow on the Beach’ chu No.30 niin, ‘Cruel Summer’ chu No.45 a ni bawk. Hengte avang hian tuma el phak rual lohin a No.1 leh ta a ni.
Lil Durk pawh No.46 aTangin No.3-ah a invawrh a, ani pawhin a album thar ‘Almost Healed’ hralh That zar a zo a, he album hi 1,25,000 hralhin Billboard 200-ah No.3-ah a debut a, he album-a a hla 15 chu Billboard Hot 100-ah a lang thei a, chung zingah chuan chart No.4 ‘All My Life’ featuring J. Cole pawh a tel.
Artist 100 Top 10:
1 Taylor Swift
2 Morgan Wallen
3 Lil Durk
4 Luke Combs
5 SZA
6 Ed Sheeran
7 Drake
8 Miley Cyrus
9 Peso Pluma
10Post Malone