Taylor Swift music video ‘Wildest Dreams’-in YouTube 1B view a kai

Taylor Swift music video ‘Wildest Dreams’-in YouTube 1B view a kai
Taylor Swift hla ‘Wildest Dreams’ music video chuan YouTube-ah vawi tluklehdingawn en a hlawh ve le ta, hetiang zat en hlawh thei music video paruk a neihna a ni ta.
‘Wildest Dreams’ hi a album pangana ‘1989’ a hla kha niin, a music video hi Joseph Kahn direct a ni a, ani hi Swift music video dang ‘Bad Blood,’ ‘Look What You Made Me Do’, ‘…Ready for It?’ ‘End Game,’ leh ‘Delicate’ te pawh lo direct tawh a ni. ‘Wildest Dreams’ hi August 2015 khan a tichhuak a, ‘1989’ album atanga a single pangana a ni.
A video-a hian Swift leh Scott Eastwood te chu Hollywood actor hranghlui lemah changin , 1950s movie, Africa-a chang angin an inlan a, he video atanga Taylor-i sum hmuh tur zawng zawng chu African Parks Foundation of America-ah nungcha humhalhna kawnga hmalak nan hman vek a nih tur thu a title card-ah an tarlang nghe nghe a ni.
He music video-a a ngaihzawng lema chang Scott Eastwood chuan a hmain Swift nen an la intawn ngai loh thu tunhnu hian a sawichhuak a, nikuma a film channa Regretting You press tour a neihnaa Swift chungchang hi sawi chhuakin, ‘Wildest Dreams’ music video-a an chandun hmain a la hmuh ngai bik loh thu a sawi a, “Taylor Swift hi khami hma khan a ka la hmu ngai bik lo. Min rawn call ve teh tlat mai a. ‘Hey, Taylor ka nia,’ a rawn tia. Kei lahin ‘Tu Taylor ber?’ te ka lo ti deuh hû a,” a ti.
He video-ah hian a inlan lo tep ni a sawiin, “Ka agent zawng zawngin inlan lo turin min duh vek. ‘Khai a, ti lo mai teh. Taylor Swift-i boy toy nih duh tur a ni lo,’ te min ti a. Keiin, ‘Eh, ka chak zawng tak alawm!’ ka lo tihsak ta zawk a ni,” a ti.
Swift hian YouTube-a vawi tluklehdingawn en hlawh thei music video paruk a nei tling ta a, ‘Wildest Dreams’ bakah hian ‘Blank Space’ ‘Shake It Off,’ ‘You Belong With Me,’ ‘Bad Blood’ leh ‘Look What You Made Me Do’ te an ni a, an video vawi tluklehdingawn en hlawh thei paruk zinga pathum chu Joseph Kahn direct an ni.