TB vei thihpui tam

National TB Elimination Programme hnuaia India ram puma ‘100-Day TB Elimination Campaign’ chu Mizoram pawhin December ni 9 atang khan a kalpui ve tan a. TB programme performance tarlan danin, kumin January atanga December 9 thleng khan TB rinhlelh mi 24,017 endik atangin TB vei 2,164 hmuhchhuah a ni a. TB vei inenkawl lai 147 an thi a. TB vei tihdam leh hi za zelah 80 a ni.
Kum khat chhunga TB thihpui hi chawhrualin thla tin mi 12 ang a ni a, chumi awmzia chu ni 2.5 danah TB vei mi pakhat zel thi ang a ni. TB vei tihdam hi 80% anga chhut a nih chuan, TB vei thi chu 20% tihna a ni. TB vei hmuhchhuah zat pawh hi a sang hle mai a; TB rinhlelh endik atanga 9% chuan TB an vei tihna a ni.
Kumin kum tir (March ni 24)-a World TB Day hman a nih khan Mizoramah chawhrualin ni tin TB vei thar 6-7 zel hmuchhuak ang kan ni, tiin report a lo ni tawh bawk. TB natna buaipui kawnga state hrang hrang hmalak that dan tehna record (NTEP TB Index)-a Performance Indicator 9-ah Mizoram Score chu a laihawl a ni a, NE-a kan tluk lohte chu Assam, Meghalaya, Sikkim leh Tripura te an ni.
Mizoram dinhmun hi, ni tin TB vei thar 6-7 zel hmuchhuak ang kan nih chuan, kan dinhmun hi a lo tha lo hle tihna a ni. TB awmzia chu kan hrechiang thawkhat hlawm tawh ang a, natna inkaichhawn awlsam tak a ni a, inkaichhawn dan tlanglawn tak pakhat pawh ‘Khuh’ atangin a ni tih pawh kan hre bel viau tawh awm e.
‘100-Day TB Elimination Campaign’ chhung hian tih tak zeta hma lak a pawimawh. Natna khirhkhan heng Cancer, HIV/AIDS, Diabetes etc. lama kan san em em tawh laia TB lamah pawh kan lo hniam hauh lo mai hi, hriselna ngaihpawimawh lama harhtharna kan chan a pawimawhzia a lo lang a. Kan fashion standard a san em em laia kan hrisel lo hle hi chu, kan lifestyle a hniam emaw a dik lo hle tihna a ni awm e.
Tunhmaa thihpui ngei ngei tura ngaih, ‘Ngawr’ natna hi tunah chuan awlsam taka enkawl dam theih a ni tawh a; chuti chunga heti zatin kan la thihpui cheu mai hi chu, tanlak nasat a ngaihzia a lo lang a ni.