TBCC-ah rilru hriselna lam inhrilh
TBCC-ah rilru hriselna lam inhrilh
Music Domain Mizoram (MDM), Mizoram State Legal Services Authority (MSLSA) leh National Health Mission (NHM) tangho chuan Tawngtai Bethel Camping Centre (TBCC) Sakawrtuichhunah ‘MDM Winter Blast 2025 Charity Sum Hlanna’ leh ‘Sensitisation on Mental Health under Legal Services to the Victims of Drug Abuse & Eradication of Drug Menace Scheme’ an buatsaih a, Excise & Narcotics minister Lalnghinglova Hmar chuan a hmanpui. MDM Winter Blast 2025 atanga hmuh tanpuina sumfai leh Excise & Narcotics Department atangin tanpuina sumfai cheng sing hnih a hlan a ni.
Minister chuan TBCC-a awm mekte chu beidawng lo turin a fuih a. Mi tam takin ruihhlo ngaihna atangin nun pangngaia kir leh thei khawpin an sual chhuak tawh tih leh, an la dam chhung chu dam chhan leh nun chhan an nei tih hre turin a chah. An dinhmun chhiat ber lai ni mah se, beiseina nena hmalam thlir tlat a, tun aia dinhmun thaa TBCC chu chhuahsan turin duhsakna a hlan a. Sawrkar chuan ruihhlo ngaite chevel a thlir reng a, an that chhuahna tur a ngaihven reng tih a sawi a ni.
MSLSA member secretary Vincent Lalrokima chuan MSLSA chu sawrkarin harsatna tawkte tanpui tura a din a ni a, District Court tina Legal Services Authority leh Legal Aid Clinic buatsaih thin chu puih ngaite pui turin an inring reng tih a sawi. Ruihhlo ngaite chu nun kawng dik an zawh duh emaw harsatna an tawh a, kal ngaihna an hriat loh emaw pan tur an hriat loh emaw chuan District Court pan tawp turin a sawm a ni.
Tele Mental Health Assistance and Networking Across States (Tele MANAS) Mizoram mental health counsellor Vanlalruata pawhin World Health Organisation-in hriselna a hrilhfiah dan chu, chak lohna leh natna neih loh ringawt ni loin, taksa, rilru leh midangte nena inkar tha neih a ni tiin a sawi a. Ruihhlo ngaih chu ‘chronic relapsing brain disorder’ natna benvawn, hun rei tak hnuah pawh dinhmun ngaia let leh thei a ni a, ruihhlo ngaite leh rilru lama harsatna nei tan District Hospital-ah puitu tur an awm a, engtik lai pawhin 14416-ah phone hmanga biakrawn theih reng an ni tih a sawi a ni.
Hetiang hun hi advisor to chief minister (Finance) TBC Lalvenchhunga hoin Operation Kingdom Ministry (OKM) Home Phunchawngah hman a lo ni tawh bawk.