K. Hmingthankaia
TBCC chanchin chhiar tur leh ngaihthlak tur tam tak a awm ta. Mi hnu khawiah ka hmuh dan leh ka hriatthiam ve dan tlangpui zawr zawr ka’n sawi ve mai mai ang e.
TBCC Chawnpuiah khan a zawna Krismas vawihnih hmang khawpin ka awm ve tawh. A chanchin tlem leh Thlarau lama ka hmuh dan pawh tawitein ka ziak tawh, mahse, ka thehdarh lo. Kum 2016 khan an naute awm ve kan turte kha, ‘Hei hi an receiption office-ah khan an Pu ber chhiar atan lo pe nghal teh u’ ka ti a, an pe ta nge pe ta lo, tih leh, khuta mite chuan an hotupa chu an pe ta nge pe ta lo tih pawh ka hre ta chuang lo. An hotupa ber nen hian tunhma Kolasib atanga lo inhmelhriat tawh kan ni. Mahse, ka awm chhungin a hrangin vawikhat mah kan inbe lo.
TBCC chanchin hi chutia sawifiah thiam mai chi leh, sawifiah theih pawh a ni lova, ziah thiam leh ziah sen chi pawh a ni lo. Chuvangin, a awm tawhte hian la awm ve lote bulah hian an sawi peih ting tang lo thin a ni. Kei pawhin ka sawi thiam peih dan ber chu, ‘Aizawl daiah Planet dang daihah nun dan dang daihin kan awm a, engmah in hrethiam ve chuang lovang’ ka ti thin. Tu emaw thu thiam tak leh taima tak, thil chhut peih leh chhinchhiah peih tak tan erawh chuan, a term khat awm chhung ringawt pawh lehkhabu chhah tak ngaihnawm taka ziah theih a ni thung.
Ngaihnawm zawng emaw, nuihzatthlak zawng emaw, hreawm zawng emaw, rapthlak zawng emawin a ziah teuh theih a ni. Drug addict-ho damdawi power tawp hreawm hmel ziate leh, zu in loh vanga chirite khu chu dan pangngaiah lo dah ta ila, zu nghei vanga â ho, an ât laia an chezia leh an thu sawite mawlh mai khu a hmuhnawmin a ngaihnawm a, ngaihtuahna a ti thui thin khawp mai. Mihring chanchin zir mite tan zir tham fe tur awmin a lang. Tin, an at laia an thu sawi thenkhatte chu hnu chhui nana tangkai tak turte pawh niin ka hre thin.
TBCC-ah hian room hrang hrang a awm a. Chung room-te chu ama kawngka bakah, a hrana hung hnan vek leh gate kalhhnan vek an ni. Chuvangin, TBCC-a awmte hi an inhre vek lova, room hrang hranga thil thleng an hre vek bawk lo. Mimal chanchin pawh an inhriatsak vek bawk lo. Chuvangin, tu pawhin TBCC chanchin hi sawi dawn emaw, ziak dawn emaw pawh nise, an thil hmuh leh hriatte, an thil tawn leh tawrhte, an awm hun chhung theuhva thil thleng hrang hrang pawh a inang lo nuai ang.
TBCC-ah hian hnam tin chi tin, Mizoram chhung kilkhawr ber atangte, Mizoram pawn Assam, Meghalaya, Manipur, Tripura leh Burma atangtein kan awm a. Mi chi tin reng, misual hnawksak takte, Synod revival Speaker lo ni tawhte, mi baihvai leh vakvaite, mi hausa tak takte, lehkha thiam sang tak takte, Sawrkar hna lian tak leh lian vak lo thawk mek leh thawk tawh lote, Police Officer leh Officer lote, Engineer leh Doctor-te leh, Driver leh hna chi hrang hrang thawkte kan awm a ni.
Kum khat chhunga thil thleng hrang hrang hi a tam em em a ni. Mizoram chhung leh pawn, India ram hrang hrang leh Foreign atangtein mi chi hrang hrang leh pawl hrang hrangin an tlawh zut a. Aizawla Kohhran hrang hrang leh pawl hrang hrangin an tlawh reng bawk a. Inkhawmna chi hrang hrang leh thu sawi leh thil eng eng emaw an tihpui fo bawk a ni. Zaithiam leh mi lar tu tu emawin an tlawh fo bawk. TBCC-a awm tawhte hian thil hi an tawng hnem em em tawh a, chuvangin, pawn lamah engmah hi an sawi vel peih meuh lo a ni. Chubakah, thil tam tak lo tawng tawh leh lo tuar chhuak tawh an nih avang hian, pawn lam mi leh pawn lam thil hi engah vak mah an ngai lo a ni.
-- Advertisement --
1. TISA lam thil:
TBBC hi tisa tak thinlung pu chung leh taksa lama tuar chhuak tur chuan harsa tak a ni. Kan awmna room hi kum 40 chin awmna, room zalen ve deuh leh duat deuh ni mah ila, kei pawhin ka nat tak tak lai chuan Pathian hnenah vawi tam thih ka dil a ni. Damlo inngaihsak chu sawi loh, chhungte hnena sawi phal a ni lo. A sawi chu hauh hrep leh hrem a ni mai. Hrem tih hian kut inthlak tak hi chu ka hmuh phakah chuan a awm meuh lo. Mahse, eng eng emaw inthawhtir leh room pawn chhuah phal lohte a ni a. Room hung chhung si, room kawngka pawnah hian chhete hawi thawvenna pawn a awm ve a. Inhrem nana room awmna sawn hi kan duh lo ber a ni. Mahni room-a lo tlangnel tawh leh siniar ve tawhna, mutna tha ve deuh lo neih tawhna atanga room danga va mikhual thar leh kha kan duh lo a ni.
TBCC hian a hranin Administrative body emaw, Committee emaw a nei hran lo. Pu Zohmingthanga din leh ta hi a ni tawp mai a. A thu thu hi a ni tawp. Mahse, mihring chuti zozai enkawl tur chuan, a awlsam thei ber tur leh mawlmang thei bera ti tur pawhin, eng eng emaw tih a ngai si. Mi lo dawngsawng tur awm a ngai a, chutiang tur chuan receiption office angreng an nei a, chutah chuan a awm siniar deuh emaw, a duhsak zawng leh a rin zawng deuh pahnih pathum a awmtir thin. Chung mite pawh chu englai pawha chhuah chak ngawih ngawih vek an ni. Tin, engemaw hlekah an thlak fo va, an hrem fo va, room pangngaiah an down leh thin. Room tin hian hotu ber, room incharge an tih chu an nei vek a, chumi hnuaiah chuan security engemaw zat an awm leh a, chumi dawtah chuan a chang sang deuh, ‘Chaw la’ an tih chu an awm leh. Room incharge hi chu Pu Zohminga’n a mi duh zawng a ruat a, incharge chuan a thawhpui turte Pu Zohminga hnenah a recommend leh thin. Room incharge leh security-te pawh hi hrem leh down an ni fo va, an thlak fo thin.
Heng zawng zawng, receiption-a thute atanga Chaw la thleng hian, ngawlvei, TBCC-a tâng vek, chhuah chak ngawih ngawih, chhuah dan tur ngaihtuah reng leh, tlanchhuak ru fote an ni. Room incharge-te hian chhuahsan an chak em em, anmahni tanna chabi leh, eng eng emaw kalhna chu an awrh chhung thin. An chhuak thei bik ngawt si lo. Receiption office kaltlang a ngai si, an vaiin an inveng tawn vek a ni. Inthuruala tlanchhuak pawh an awm zauh zauh.
Ni tin Pu Zohminga hoin ramhnuaiah motora thing phurh thin a ni. Security leh a mi rin zawngte an kal thin a, thingphurhna atanga tlanchhuak an awm fo. Tuk tin mahni room-a tuah tur thing dahkhawmna atanga lak a ni a, thing lakna atanga remchang hmua tlanchhuak an awm thin. Tuk tin, security pakhat hoin bawlhhlawh paih thin an awm a, security hova tlanchhuah dial chang a awm.
Aw le, thil sawi sen a ni lo. Room chhung lam tlem sawi ang. Room-a intithuho hi ngawlvei ve tho, khawsak hnuaihnung ve tak tak, mawl ve takte kha an ni a. Chungho chu chhuah chak em em ve tho, ngawltawt lutukho duh tawka an inluling kha, midang, rilru chhungrila lungawi lohna lo neisa tûn tan kha chuan a huatthlala ta em em a ni ber. Chung room hruaitu leh receiption-a thute leh, all in all security tlemte te hian Pu Zohminga tihlawm loh hi an hlau em em a, a duh loh zawng tur niawma an hriat thil a awm chuan mipui lamah an tuan ta thin a ni. Hetiang a nih avang hian, room-a damlo an awm pawhin Pu Zohminga an hrilh ngam lova, an chhungte an hrilh ngam bawk lo a ni.
Thla thar hlim apiangin kan chhungte hnenah kan room pumpui mamawh tur ei leh in leh sa min chahtir ziah a, chhungte nei lo mi engemaw zat chah kep an ngai a ni. Keimahni mamawh sahbawn leh meizial vel tih loh, ei leh in lam chu hmunkhatah an la khawm vek thin. Chutiang chah nan chuan room incharge chu phone an kawltir a, room mamawh thil chah bak chu kan chhungte biak phal a ni lova, thil kan chah lai pawhin an lo ngaithla kara, thil dang sawi phal a ni lo, damlo thu sawi phei chu phal loh bur a ni. Thla thar hlima vawikhat kan chhungten kan mamawh min rawn pek laia, interview an tih hun lai pawhin kan tawng an lo ngaithla vek a, damloh deuh thu emaw, Center chungchang emaw, pangchanna lam thil deuh kan sawi vaih chuan room lama tawrh a ni mai. Kan bula mute an damlo ná êm êm a, kan en liam mai mai a, an thih hnu pawhin an mutna ngaiah an mut dan ang angin an awm a, kan kal kán vel mai mai a ni. Rei fê hnuah mitthi dahna inah tuma kil lohvin rei tak, an chhungte lo thlen hma chu an dah thin. |henkhat chu an nat fe tawh hnua an chhungte an hrilh takte an awm a, thenkhatte chu in pawh an thlen hmaa thi ta thote an awm bawk.
Heng zawng zawng hi room incharge-te thiam loh a ni vek lova, inkaihhruaina fel leh tha a awmloh vang leh, Pu Zohminga an hlauh em avang leh, Pu Zohminga’n damloh chhuanlama mi an lakchhuah a hlau nia an hriat vang a ni. Khulaia awm chhung na na chuan Pu Zohminga tihlawm kha an tum ber a ni a, chumi tur chuan mahni awmpuite tihhreawm te chu addict-ho chuan pawiti hek lo.
Aw le, mutna lamte, ei leh in lamte, inthiarna lamte leh inbual lam hreawm ziate chu sawifiah theih pawh a ni lova. Chungte chu Center leh Home-ah chuan kan tawrh tur reng alawm, kan tih rualin, khulai khu chu phuahchawp lutuk leh, tu mai pawh khuan lungawi lo lutuk chunga tuar an nih avangin a hreawm zual bik em em a ni. A hreawmzia hi a tuartu lo chuan an hrethiam chuang lovang.
Heng zawng zawng hi Pu Zohminga thiam loh pawh chu a ni vek leh chuang bik lova, room chhung thil awm dan dik tak hi a hre miah lova, room hruaituten amah an hlauh em avangin engkim a tha zawngin an hrilh zel si a. TBCC-a awmte hian, Pathian thu-ah emaw, an mimal thilah emaw, damlohna a ni emaw, eng thil pawimawh leh rawtna eng pawh nei mah se, Pu Zohminga hi a hranga hmuh phal a ni lo. Zing leh zanah Biak inah sermon tur leh a duh duh sawi turin a kal tawp a, chumi hunah chuan tute emaw rilru tawt lutukin a bulah thil lo sawi ta se, room lama inhauh leh tho a ni. Mahse, amah va pana thil sawi lui chu an awm leh zauh thin. Aw le, mihring lama a hreawmna hi chu kan sawi seng dawn chuang lova, duhtawk phawt ila.
2. THLARAU MIT ATANGIN:
TBCC-a awm hreawmzia chu, tisa rilru pangngai pu chung leh taksa pangngaia tawrh atan chuan a namai lohzia chu a awm tawhten kan hriat vek kha. Nimahsela, chuti taka hreawmna hmuna eng vanga awm nge ka nih tih hi kan hriat a pawimawh ber. Mahse, Thlarau mit fiah tak atang lo chuan hmuh fiah theih a ni lo. Keimahni duthua lut emaw, tute emawin min nawr lut lui emaw pawh ni rawh se, Pathianin he hmun hreawmah hian awm hrih turin min ti a ni tih hi nghet taka kan pawm a ngai. Min dahtute avanga rilru dam thei lo kan tam em em a ni. Min dahtute emaw, khulaia kan chunga roreltute emaw, hmun dang atanga min rawn tlawhtute leh rawngbawlna rawn nei thinte, a thente phei chu Sermon zir nana rawn hmangte hi keini aia an fel bikna kan hmu thei lova, mahni felna leh dikna kan hmu lian em em a, mahni kan inkhawngaih nasa lutuk a ni. Chhuah huna tu tute emaw chunga phuba lak dan ringawt kan ngaihtuah thin. Chumi avanga khulaia awm chhung zawnga hreawm ti lehzual kan ni. Mahse, tute pawhin min dahlut se, min dahtute kha Pathian ngaiha mifel a ni chuang hauh lova, midang lakah leh Pathian ngaiha mi sual leh tenawm ber pawh an ni thei. Kan thatna tura Pathianin a hmanrua mai mai an ni tih hriat tlat tur. A hnam thlan, Israel-te pawh an thatna tura zilh nan chuan Amah dotute pawh a hmang mai a ni.
Pathianin a mi hriat tawh, a thlan ni site, Amah ngaihsak duh miah lo kan ni chung pawha, thihna lak ata pawh vawi tam kan hriat miah lohva min lo venhim tawhte, vawiin thlenga nungdama la awmte hi, Amah hlat zawnga pen khat pawh kan pen leh chuan Hremhmuna pen lut tawh tur, thi nghal mai tur kan nih tawh avanga a zilhna hnuhnung ber atan, Thlarau Thianghlim aw zawi leh nem pawh ni tawh lo, HAWRAWPPUIIN, ring tak leh vin takin min ko ta a, thirkawm lianpuiin khawvel kawng kan zawh lai atangin min kuaiher sawk ta a nih hi tih hrethiam ila chuan, kan mihring tawrhna hi chu a ziaawm ngei ang.
Khu hmun khu Pathian leh Setana indona hnuhnung, Setana’n a ta tur ni chiangsa tawha a ngaihte a chân leh mai tur chu phal lovin, nasa takin tan a la a, khuta kan awm chhan leh Pathian thil tum kan hmuhfiah theih lohna turin, Pathian lama kan rilru helna turin hreawm tinreng min tuartir a, mahni inthiamna leh mahni inkhawngaihna hlir min neihtir a ni.
Khu hmun khu Pathian leh Setana ram inchuhna tawp ber a nih avangin, aw zaidam leh nem a awm tawh lova, indona hmanraw hraw leh ri ring em em a ri ta bur bur a nih khu. Pathianin a thlan, a hriat bikte kan nih avanga a kohna hnuhnung, kan tana last chance atan khutiang hmun hreawm tawpkhawkah khuan min dah a ni tih hrethiam ila chuan vannei kan inti ang a, hreawm tawrh dan pawh a zia ngei ang.
Pathianin a thlan leh a hriat bik kan nih avanga midang aia danglam bik tura min duh avangin, khutiang hmun hreawma kan awm a phal a ni tih hi hrethiam ila chuan, khuta awm ve lo, mifel emaw inti, intifel ho hi kan ngainep ngawt ang. Thlarau mit atang hi chuan a fiah em em mai si a.
(phek 5-na zawmna…)
Kei pawh khu hmun atang khuan thisen sang ka pawchhuaka, thimtham zinga chhuata thu kun chunga hniam taka bih chunga Bible leh a chhehvel study-a kum hnih vel chhung, chhun zan zawma lehkha ka chhiar nasat leh ka ziah nasat lutuk avangin ka nghawng ruh, cervic spine ka tichhia a, mahse, chu chu chhuang zawkin, doctor-in nghawng dam, cervical collar min awrhtirah chuan, Paula’n “Tun atang chuan tuma’n min tibuai tawh suh se, ka tisaah hian Isua chhinchhiahna ka pu tawh si a” tih thu a sawina Bible bung leh chang kha ka nghawng damah chuan ka tar kalh thin.
Nimahsela, chutiang hrethiam duh lova, khulai atanga tlanchhuah tum talh emaw, khulaia an awm chhunga harh chhuak thei lova, Setana aw ring tak hmang khuan an beng an hliahtir tlat chuan, an tan dam chhung leh thih hnuah beisei tur a awm tawh lovang. Tlan chhuak lui va thi nghal maite, khulai atanga harh chuang lova eng tin tin emaw chhuah luih talh dan ngaihtuaha, va thi leh mai site hi an ngaihtuahawm khawp mai. A thi hrih lote tan pawh ropuina engmah beisei tur a awm tawh lovang. Khulai hmuna thi ta zawkte hi an nihlawh zawk maithei bawk. Pathianin engkim a hre vek si a.
Khulai hmun khu Pathian leh Setana’n mihring min inchuhna hnuhnung ber leh vawrtawp a nih avangin Pathian pawh Thlarau Thianghlim nem takin a che tawh lova, raw tak leh rum takin a che tawh a ni. Setana pawh raw taka a chetna a ni. Biak ina Pathian faka kan zai ho lai hi kan hlim lai ber leh kan thawven tlan lai ber niin ka hria. Mahse, Biak in kan pela lungawi lohna hlirin kan khat leh thin. Chu chu raw taka Setana hnathawh a ni. Ka awm lai khan Biak in lamtuala Setana thua lam ziah, a chhung lama turtu ramhuai a hmel leh cheziaa lo lang thin a awm
Pathianin kan thlarau chunga mawh a phurh loh nan- heng Pathian thu, “Nimahsela, thiam loh chantirtu tur an nei, chu chu an thu hriatte khan” tih te, “Engtin nge hrilhtu an awm lohvin an hriat theih ang, engtin nge an hriat lohvin an rin theih ang” tihte hi a dik theih nan Pathianin a tawp nan, amah leh amah thiam inchantir nan raw taka min kohna ni berin ka hria. Chuvangin, khulai atang khuan mi tlemte bak an harh chhuah ka ring lova, mahse, mi vannei tlemte zinga tel ngei chu kan tum tur a ni si.
Kan sawi tawh angin, Pathianin a mi thlan, a hriat tlat, a mi special-ten an hawisan tlat si avanga khutiang hreawm zawng zawng khu a tawp nan an tawrh a phal a, Pu Zohminga duh dana hreawm pawh a ni lova, Pathian remruata lo hreawm mai a ni. Pu Zohminga khuan enge a nih a, enge a tih pawh a hrechiang bik kher lovang, Pathianin awm tur leh ti tura a tih angin an awm tawpa, a ti mawp mawp mai niin ka hria. An inrelbawl dan zawng zawngte khu Pathianin tawk a tih dan anga awm mai niin kei chuan ka hmu. Amah Pu Zohminga pawh khu Pathian a ni lova, mifel chungchuang emaw, mi danglam chungchuang emaw a ni hek lo, Thlarau mi tak a ni emaw, ni lo emaw, Pathian hmanraw pakhat mai niin ka hmu.
Chuvangin, he |awngtai Bethel Camping Center hi mihring thil taka ena, mihring taka buaipuia, khawvel dan ang taka kalpui chi pawh niin ka hmu lova, mahni duh duh hawi zawnga lo tawng chiam pawh hi a ngamawm lo hlein ka hria. Khawvel dan ang takin, mihring duh danin sawngbawl ta ila, Pathian ruahmanna thuk tak hi kan bawhchhe mai lovang maw ka ti deuh a ni.
Kei pawhin Pathian thil tum ka hmuhfuh hma chuan, khulai hmuna rilru na taka kan innawr luh hnua, khulaia hreawm tawpkhawk leh rilru na kehchhe veka mi tam tak an awm avang hian, kan rama inhmangaihna tla hniam tate, inrintawn lohnate, midang chunga rilru hrisel put theih lohnate, a lem leh a dera khawsak velna te hi lo hluar ta niin ka ngai thin. Chu chu a dikna chen pawh a awm ngei ang. Mahse, chungte pawh chu Pathian duh dan hmu fuh lote avanga lo thleng chu a ni reng si a.
Khu hmun ka hmuh dan leh hriat dan hi a dik lo a nih a, kan awih lo a nih chuan khu hmun khu eng dang ni lovin, mihring taksa leh rilru tihkhawlohna hmunpui bak a ni lo ang e.
Khing thute khi tute emaw hmin tum vang emaw, tute emaw tihlawm tum vang emaw, tute emaw sawichhiat tum vang emawa sawi ka ni lova, tin, sawi zui chiam emaw, inhnial vak nan emaw pawha sawi ka ni hek lo. Keima hmuh dan leh, ka thinlunga a fiah dan anga sawi mai ka ni. Thlarau mit atang chuan a fiah em em si a.