Team liante chak zan

Team liante chak zan

Slovakia khawpui hrang hrangah UEFA European Under-21 Championship 2025 khelh chhunzawm zel a ni a, inrinni zan khan team lian; Spain, France, Portugal leh Italy ten hnehna an chang hlawm.
Champion tura rinkai zinga mi Spain chuan Inrinni zan khan Romania an hmachhawn a, hma takah goal chhuah mah se hun tawp dawnah hnehna an chang let a, Group A hmahruaitu ni turin hnehna an chang.
Romania hian Spain lakah bul an tan tha viau a, inkhel tan atanga minut lina lekah Louis Munteanu chuan hmahruaina goal a thun nghal. Munteanu goal thun hi hun rei tak chhung an venghim a, an chakpui teuh viau nghe nghe. Hun rei tak chhung hma an hruai hnuin hun tawp dawn hnaihah an chesual hlauh a, Vladislav Blanuta chu minute 84-naah hnawhchhuah a ni.
Tam zawk an nih vangin Spain an phur a, goal an thunn zui ta thuai bawk. Mikel Jauregizar chuan minute 85-naah goal thunin an si phurh a sut. An si phurh an sut vangin an phur hle a, Roberto Fernández chuan minute 88-na lekah hma an hruai letna goal a thun zui leh nghal zat bawk a. Mawi taka an khingpuite lehthalin point thum hlu tak an hmu.
Group B-a inkhel dangah Italy chuan inelna thlengtu Slovakia chu minute 7-na leka Cesare Casadei goal thun hmangin an hneh. Group A-ah hian Spain leh Italy ten point 7 ve ve an hmu a, goal difference-ah +2 ve ve a ni mek bawk a, an inel tawk hle.
Inrinni zana inkhel dangah Portugal chuan an khingpui Poland chu 5-0 ngawtin an sawp. Portugal tan hian Geovany Quenda chuan goal hnih a thun a, Henrique Araújo, Paulo Bernardo leh Rodrigo Gomes ten goal khat theuh an thun bawk. Group C-a inkhel dangah France chuan 3-2 in
Georgia an hneh ve bawk. France tan hian Mathys Tel, PenJohann Lepenant leh Thierno Barry ten goal khat theuh an thun a. Georgia tan Giorgi Abuashvili leh Saba Sazonov ten goal thun bawk mah se uiawm takin an tlawm zui ta tho a ni. Group C-ah hian Portugal leh France ten khelh hnih atangin point li an hmu ve ve a, goal difference-a tha zawk Portugal chu group hmahruaitu an ni.