Technology leh hmangaihna

Nupaa khumlaizawl belh tawh hnu chuan light off-a, laptop leh mobile phone te dah thaa, nupaa inkawm a hun tawh tihna a ni.
Mahse, mut hmunah i cell phone i la kheuh neuh neuh a, a nih loh pawhin TV remote i la hum ran. A nih loh leh musicplayer i la khal zawk em ni. Chutiang chu ni lenga i kawppui nena hah taka hun in hman hnua i chawlh hahdamna niin i ngai a ni mahna. Technology hian kan mimal nun hi kan suangtuah theih piah lamin min luhchilh tawh a, heng gadget-te hi inbiakpawh nan leh mite min thlunzawm tura siam a nih laiin, min then hrangtu a ni ta tlat mai.
Chhungkuaa tuma tihbuaia lova hun hman te i ngaihtuah ngai em? Chutiang hun hman tuma chhungkuaa kan rik laih laih laiin, tu emaw tih tur nei loin emaw a rawn text che a, in chhungkaw programme a rawn tibuai thei tlat. Heng gadget hian kan mimal nun inhumhalhna a tibo telh telh a ni. Office atangin i haw tawh a ni mai thei, mahse, office atangin an rawn be pawp thei reng tho che. Chumi awmzia chu, office chu i chhuahsan tak tak chuang lo tihna a ni!
I ngaihzawng emaw, kawppui emaw nen thil pawimawh tak insawi laiin i phone a lo ri a, tu emawin eng emaw ti turin a rawn ngen che a, in titi lai a rawn tibuai ta vek a ni. Technology hi ‘relationship killer’ a nih theihna chen a awm ta, niin psychologist Harish Shetty chuan a sawi.
Nupa thenkhat chuan office hna te inah kan hawn a. Khumah kan thu dun a ni maithei, mahse, kan rilru chu hmun dang daihah a awm a, mahni hna tul tulin kan tul a, kan laptop kan bih ngur a. Technology lamah kan thang a, awlsam taka inbiak pawh zung zung theihna kan nei ta, mahse, chu chuan nupa min then hrang ta hlauh zawk niin an sawi.