Tek den natural disaster-ah puan tumna awm lo

Union government chuan tek tla avanga tawrhna chu khuarel chhiatna (natural disaster) a puan a duh lo va, a chhan ber pawh zirtirna tha hmangin pumpelh theih nia a ngaih vang tia sawi a ni. India hi tek tla tur hrilh lawk theihna hmang khawvel ram panga zinga pakhat niin tek tla tur hi a hma ni nga atanga a tlak dawn darkar 3 vel thlengin hrilhlawkna a awm a ni.
State hrang hrang Bihar leh West Bengal te ang chuan tek avanga nunna channa chu natural disaster-a puan an ngiat tawh reng a. Khuarel chhiatna anga ngaih ni se chuan State Disater Response Fund (SDRF) hnuaiah tihchhuah a nih hnuah zangnazawmna pek theih a ni dawn a. SDRF hnuaia fund 75% hi Centre tum a ni.
Tun dinhmunah chuan cyclone, khawkheng, lirnghing, kangmei, tuilian, tsunami, thlipui, leimin, vur tawlh, ruahsur nasa thut, rannung puang, frost leh cold waves te chauh chu SDRF hnuaia ‘disaster’ tih chhunga tel a ni.
Bihar Disaster Management Minister Shahnawaz Alam chuan Bihar chu tek avanga tuar nasa ber State a nih thu sawiin kumin July 6 thleng khan tek tla avangin mi 107 in nunna an chan tawh tiin a sawi a.
“Tun hnai kum chhovah tek avanga nunna chan an pung nasa hle a. A chhan ber pawh climate change ni neia ngaih a ni a. Tun hnai kum nga chhungin Bihar-ah tek tla avangin mi 1,500 chuangin nunna an chan phah tawh a. June 25, 2020 bikah phei kha chuan nikhat thil thu-ah tek den avangin mi 100 chuangin nunna an chan a ni,” tiin Alam chuan a sawi.
July 13 khan Ministers of Disaster Management of States tena Delhi a meeting neihna Union Home Minister Amit Shah kaihhruaiah sawi lan a nih tawh thu a sawi bawk a.
Minister chuan mipuite hnenah pamphlet hmangtein panchayat level tin thlengin tek hlauhawmna te inven dan turte hrilh hriatna thehdarh a nih thu a sawi a.
“A chang chuan mipui ten fimkhur ngaihna an hriat phah a, an inveng fimkhur bawk a. Mahse, farming season vanglai chuan mi thenkhatte chuan a hlauhawmna an namnul lo thei lo fo thin. A then chuan thu an awih theih laiin mahse a rethei ber berte chu a tuartu an ni zel a ni,” tiin Alam chuan a sawi.
National Crime Records Bureau (NCRB) te chuan kum 2021 khan tek tla den avangin nunna chan 2,880 an awm a ti a, kum 2019 khan 2,876 in nunna an chan thung a ni.
Director-General, India Meteorological Department (IMD) tena National Platform for Disaster Risk Reduction Conference (NPDRR) a report an pekah tek tla chu northeast State leh West Bengal, Sikkim, Jharkhand, Odisha leh Bihar ah a nasa ber a. Mahse, nunna chan phahna chu central Indian state Madhya Pradesh, Maharashtra, Chhattisgarh leh Odisha-ah a sang ber thung an ti.