Ter Stegen an captain tir leh nghal!

Barcelona-in club thu a awih loh vanga a captain nihna an hlihsak Marc-Andre ter Stegen chu darkar 24 hnuah captain atan an senglut leh nghal!
2014-15 Champions League-a Barca champion-puitu goalkeeper tawnhriat ngah Ter Stegen hi karliamta Ningani mai khan kumin July thlaa a hnungzang hliam zai chungchanga thu inhmu lo avangin a khelhna club chuan captain a nihna atangin an chawlhtir thu an puang a, mahse, ni khat hnuah German keeper hian a dinhmun ngai a luah zui leh ta mai a ni.
Chhuak hmasa lama tarlan tawh angin, player thar leina atana sum hman tur chungchang thununtu La Liga kaihhruaina danah player inhliam chawlh rei chhung azirin club-in squad-ah player thar ziahbelh theihna dan a awm a, chu mi tur chuan Barcelona hian an captain inzai chu thla li tal chawlh la tling turin an ti a, mahse, kum 33 mi hian social media lamah thla thum a chawlh tur thu a puang a, club thu a awih loh avangin an keeper chu La Liga ngaihah midang lakluh theihna khawpa chawl rei (long-term absentee) a ni thei ta lo a, Catalan team lungawi loin a captain nihna an hlihsak thu an puang zui ve ta a ni.
An inbiak nawn leh hnuah inremna an siam thei a, club lamin an player inhliam chu season laihawl thleng a hlawh tur atanga 80% an clear theih dawn tak avangin player thar sengluhna tur fund an neih belh thei dawn ta a, an thu a awih tak avangin Ter Stegen pawh chu captain-ah an hlang chho zui leh ta a ni!
Kum 2014-a Borussia Monchengladbach atanga Catalan team a zawm hnu khan Ter Stegen hian Nou Camp club tan game 400 chuang khel tling tawhin, lawmman a lakpui tawh zingah Champions League trophy pakhat leh La Liga title paruk tehreng a tling.
La Liga champion Barcelona hian tun nipui chhung hian keeper Joan Garcia chu Espanyol atangin an lei tawh a, England striker Marcus Rashford pawh Manchester United atangin loan-in an hruailut tawh a ni.
Barcelona manager Hansi Flick chu a nungchang avangin Uefa lamin an thunun a, season thara Barcelona Champions League match hmasaberah hian khelmualah team a enkawl an phalsak dawn lo.
Kumin May thla Champions League semi-final second-leg match-a Barcelona-in 3-4-a Inter Milan an hneh loh tum khan German coach hian referee thutlukna a sawisel nasa deuh a, Uefa disciplinary committee chuan match khat hrem bakah £17,000 chawi turin an hrem a; Serie A club nena vawi hnih an inkhelh belhkhawmah Spanish club kha 7-6-in an tlawm nghe nghe a nih kha.
Kha mi tuma a chet dan avangin Flick-a assistant Marcus Sorg pawh head coach hremna ang chiah pek ve a ni a, September ni 16-18 chhunga Champions League opening round an khelh hunah hian head coach leh assistant tel loin Barca-in bul an tan a ngai dawn ta a ni!
Bayern Munich leh Germany boss hlui Flick hi nikum June thla khan Barcelona manager atang sengluh a ni a, a season khatnaah La Liga, Copa del Rey leh Spanish Super Cup trophy a lakpui nghal thawt!
Barcelona forward pahnih Lamine Yamal leh Robert Lewandowski-te pawh anti-doping officer-te thupek an zawm that loh avangin £4,300 ve ve chawi tura hrem an ni ve bawk.