Ter Stegen an zai hlawhtling

Ter Stegen an zai hlawhtling
Pathianni La Liga inkhel pakhata 5-1 tehrenga mualneitu Villarreal an sawp tuma inhliam Barcelona goalkeeper leh an captain ni bawk Marc ter Stegen-a khup na chu Thawhtanni khan hlawhtling taka zai a nih thu puan a ni a, a chawlh rei tur chin hi official lam atanga puanzar awm lo mah se Spanish media lam chuan a lo berah pawh thla sarih vel tal a chawlh an ring.
Germany international ball man tura zuang tlu chu a khup ding lam a sawh a, hlang hmanga zawnchhuah niin, inzaina chemte a hmachhawn zui ta a ni.
Kum 32-a upa Ter Stegen chungchanga club thuchhuah chuan an first-choice keeper an chhawr theih rih tawh loh tur thu tarlangin, a kir hun tur chu ngai a awh chak danin a la hril dawn niin an sawi.
Barcelona thuchhuah chuan Barcelona Hospital-ah an club Medical Services enpuina telin Dr. Joan Carles Monllau hoa zai a nih thu an tarlang.
Villarreal game-ah khan half time dawnah Ter Stegen kha ball man tura a zuang chu a ke dinglam a lo tihnat tawh ring chungin a tla fuh lo a, khelmuala a vial ngal ngal hnuah zawn chhuah a ni.
Tuna a tihnat leh a ke dinglam hi tunhma lamin vawihnih a lo tina tawh a, tah pawh chuan zai a lo tawk ve ve tawh a, tuna a intihnat leh rual khan Spanish media lam chuan a season a tawp felah an puang nghal nghe nghe a ni.
Ter Stegen hian kum 2014-a Borussia Monchengladbach atanga Nou Camp a pan hnu khan Catalan team tan hian game 400 chuang a khel tling tawh.
A hliam ngai bawka zai hial a tawh leh tak avang hian Barca game pawimawh tak tak a khel thei dawn lo phawt a, chu’ng zingah chuan thlathar Champions League match pakhata Hansi Flick-a team-in Bayern Munich an hmachhawn tur bakah defending champion Real Madrid nena LaLiga match an khelh tur a tel.