Territorial Army lak hun tur sawn

Mizoram-a Territorial Army lak hun tur chu chhan hrang hrang vangin sawn hlat a ni a, kumin November-ah lak hman tum a ni.
Territorial Army lak tura sawrkarin hma la turin a din hmasak Coordination & Land Search Committee chuan thuthar thehdarhtute hnena an lo sawi tawh danin, an ruahman dan chuan kumin July 26 atanga lak tan tum a ni a. Hetihlai hian he Committee chairman Lt. Col. Clement Lalhmingthanga, MLA chuan khawchhia leh thil dang vangin kumin November-a sawn a ni tih a sawi.
Thudawn danin, tun dinhmunah Lunglei leh Aizawl-ah 119 Infantry Battalion – Assam Regiment kaihhruaiin an hnuaiah company hnih an inbun tawh a. Aizawlah hian Assam Rifles hmun chhuahsanah an awm lailawk a, Bung Bangla Tourist Lodge building-ah an awmna tur ruahman sak tum niin, a kaihhnawih department hoin a cheithat hna an thawk mek. Lunglei lamah pawh Assam Rifles hmunah tho an awm rih a ni.
A hmaa lo ruahman chhin ang chuan, Territorial Army atana sipai lak hi kumin July 26-ah Aizawl district tan tan tum a ni a; July 27-ah Champhai leh Siaha district tan, July 28-ah Mamit leh Serchhip, July 29 Kolasib leh Khawzawl, July 30 Lunglei leh Lawngtlai, July 31 Saitual leh Hnahthial tan tih a ni. Harsatna avangin a hun hi sawn a ni leh dawn a, a tul anga inhriattir leh tur a ni tih thu dawn a ni.
Mizo Territorial Army bultanna atan company hnih atan hian a thawhkhatnaah mi 72 lak phawt a ni dawn.