Thadou-ten sorkar siamnaa tel lo tura Kuki-in Zo MLA 10 an tihna dem

Thadou-ten sorkar siamnaa tel lo tura Kuki-in Zo MLA 10 an tihna dem
Manipur-a Thadou hnam pawl lian chuan Kuki hnam pawlin ‘Kuki-Zo’ MLA-te chu an state-a mipui thlan sorkar dinnaa tel ve lo tura an ti ngawt chu tha an tih loh thu leh an dem thu an sawi.
Thadou hnam pawl lian ber nia inchhal, Thadou Inpi Manipur (TIM) hian Kuki Inpi Manipur (KIM) chuan Thadou, Hmar, Paite, Vaiphei, Zou leh Zo hnam penga an hruaitute chu an zavaiin an duha an tih theih ngawt an ni lo tih an sawi.
TIM hruaitu hlunte chuan KIM hi MLA pahnih, Nemcha Kipgen leh Haokholet Kipgen te awmna, Kangpokpi district-ah engmah huhang an nei ve lo niin an sawi.
“Hei bakah hian KIM hian Zomi MLA dang – Vunzjagin Valte leh LM Khaute, leh Hmar MLA Ngursanglur Sanate te lakah pawh huhang engmah an nei lo. KIM awmna huam chhungah chuan Kimneo Haokip Hangshing, Paolienlal Haokip, Chinlunthang leh Letzamang Haokip te chauh MLA an awm a ni,” an ti.
“Thadou-te hi Manipur pumah awmin tual chhung, state leh ram puma MDC, MLA leh MP inthlanah vote kan thlak thin a. Tunah hian ‘inrelbawlna hran’ duhtu Zo MLA zingah Nemcha Kipgen, Letpao Haokip leh Haokholet Kipgen te hi Thadou ST certificate nei an ni,” tiin TIM hian Thawhlehni khan thu an chhuah.
“Anni hi Kuki anga chhiar an nih dawn chuan AKT certificate an neih a ngai a… engmahin Thadou ST certificate nei MLA-te hi dan anga mipui sorkar an telna tura an chetnaah a nawr thei lo va, Kuki an ni lo va, Thadou an ni,” tiin an sawi a. AKT an tih hi ‘Any Kuki Tribes’ tihna a ni.
‘Kuki-Zo’ an tih hi Any Kuki Tribes (AKT) Scheduled Tribes (ST) category-ah awmin Thadou chu hnam dang, danin a pawm leh kum 2011 chhiarpuia nuai 2.16 an nih thu leh kum 1881 Census of India atangin chhiar an ni a, Manipur-ah hian tribal zingah a tam ber niin Meitei tih lovah chuan a lian ber an nih thu TIM hian an sawi.
Inrinni khan KIM hian thuchhuah siamin ‘Kuki-Zo MLA tumah mipui sorkar thar siamnaah tel lo turin’ an ti a. An thuchhuah hi an thawhpui Kuki hnam pawl hnih bakah pawl lian dang pahnih, Kuki National Organisation leh United People’s Front an pe a. Heng pawl lian pahnih hi sorkar laipui leh state sorkarte nena suspension of operations (SoO) agreement siamtu hel pawl 25 aiawh telna a ni.
Manipur-a cheng hnam hnih, Meitei leh Kuki hi May, 2023 atang khan intibuai tanin mi 260 chuang thi an awm tawh a, mi tam takin an in leh lo chhuahsanin baihvaiin an awm mek.
February thla khan chief minister atangin N Biren Singh-a bângin President’s Rule-in an awm mek a, tun hnaiah sorkar pangngai din leh tumna thawm a awm mek a ni.